काठमाडौं । नेपाल दक्षिण एसियाली फुटबलको प्रतिष्ठित प्रतियोगिता साफ च्याम्पियनसिपमा कठिन समूहमा परेको छ । भारतको नयाँ दिल्लीमा बुधबार भएको समूह विभाजनमा नेपाल समुह ‘ए’ मा पर्दा नेपालले भारत, पाकिस्तान र कुवेत प्रतिद्वन्द्वी पाएको हो ।
समूह बीमा भने लेबनान, माल्दिभ्स, भुटान र बंगलादेश रहेका छन् । च्याम्पियनसिप भारतको बेंगलुरुमा असार ६ देखि १९ गते सम्म आयोजना हुँदैछ ।
नेपाल माल्दिभ्समा भएको अघिल्लो संस्करणको फाइनलमा पुगेको थियो । तर, फाइनलमा नेपाल भारतसँगै पराजित हुन पुगेको थियो ।
यसपटक दक्षिण एसियाबाहिरका दुई राष्ट्रले साफ च्याम्पियनसिपमा प्रतिस्पर्धा गर्दैछन् । दक्षिण एसियालीका ७ मध्ये ६ राष्ट्रको सहभागिता साफ च्याम्पियनसिपमा रहनेछ । श्रीलंका भने फिफाबाट प्रतिबन्धका कारण सहभागिता जनाउने छैन ।
