एजेन्सी । क्रिकेटर सचिन तेन्दुलकरका छोरा तथा मुम्बई इन्डियन्सका बलर अर्जुन तेन्दुलकरलाई लखनउमा कुकुरले टोकेको छ । जसका कारण अर्जुनले १५ मेको एकना स्टेडियममा भएको अभ्यास सत्रमा बलिङ गर्न सकेनन् ।
लखनऊ सुपरजायन्ट्सले सोमबार राति ८ बजे अर्जुनको भिडियो ट्वीट गरेर यो जानकारी दिएको हो । भिडियोमा अर्जुन आफैंले एक दिन अघि कुकुरले हातमा टोकेको बताइरहेका छन् ।
अर्जुनले यो जानकारी लखनऊ सुपरजायन्ट्सका खेलाडी यदुवीर सिंहलाई दिइरहेका छन् । तर, खेल्ने क्रममा अर्जुनलाई घरपालुवा कुकुरले टोकेको स्रोतले जनाएको छ । यद्यपि, यसको पुष्टि कसैले पनि गरेको छैन । यसबारे टिमका अन्य खेलाडीबाट कुनै बयान आएको छैन ।
मुम्बई इन्डियन्स टोली लखनऊ सुपरजायन्ट्ससँग आईपीएल खेल्न लखनउको एकना स्टेडियममा आएको छ । टोलीलाई हयात होटलमा राखिएको छ । यस्तो अवस्थामा टोलीका खेलाडीहरू होटल पछि सिधै स्टेडियममा आउँछन् । अब अर्जुन तेन्दुलकरलाई कुकुरले स्टेडियममा टोकेको हो वा होटलमा, यो खुल्न सकेको छैन ।
आज साँझ ७ः४५ बजे लखनउ र मुम्बईबीच खेल हुँदैछ । प्लेअफ होड रोमाञ्चक बनिरहेका बेला दुबै टिमलाई जित अत्यन्त महत्वपूर्ण छ ।
मुम्बई इन्डियन्सको बेन्चमा विगत केही सिजनमा बसेर अर्जुन आईपीएल डेब्यूको पर्खाइमा थिए । उनले कोलकाता नाइट राइडर्सविरुद्ध आईपीएलमा डेब्यू गरेका थिए । डेब्यूपछि उनले लगातार ४ खेल खेले र त्यसपछि टिमबाट बाहिरिए । अर्जुनले खेलेका ४ खेलमा ३ विकेट लिएका छन् ।
