काठमाडौँ । सरकारले यही जेठ ५ गते नीति तथा कार्यक्रम ल्याउने तयारी गरेको छ । प्रधानमन्त्री पुष्पकमल दाहाल प्रचण्डले आज बिहान सभामुख देवराज घिमिरेसँगको भेटमा सो जानकारी दिनुभएको हो ।
सभामुख घिमिरे प्रधानमन्त्री प्रचण्डलाई भेट्न मंगलबार बिहान प्रधानमन्त्री निवास बालुवाटार पुग्नुभएको थियो । भेटमा उहाँहरुबीच संसद् बैठक, सरकारको नीति तथा कार्यक्रम र बजेटबारे छलफल भएको थियो ।
सभामुख घिमिरेले संसद् सञ्चालनका लागि सबै दलसँग समन्वय र सहकार्यको प्रयास गरेको भन्दै प्रधानमन्त्री प्रचण्डको सराहना गर्नुभएको थियो । मंगलबारदेखि संसदीय समितिहरुको बैठक सुरु भएपछि संसद्ले लय समातेको उहाँले बताउनुभएको थियो । सभामुख घिमिरेले संसद्मा विचाराधीन विधेयकहरु टुंगो लगाउन अब सहज हुने अपेक्षा गरेको जानकारी दिनुभएको थियो ।
भेटमा उहाँले संसद् सचिवालयले पनि नीति तथा कार्यक्रम र बजेटको तयारी गरिसकेको जानकारी दिनुभएको थियो ।
सदनमा उठेका विषयमा सरकारको जवाफ नपाएको गुनासो सांसदहरुले गरेको जानकारी गराउँदै सभामुख घिमिरेले यो कुरालाई गम्भीरतापूर्वक लिन प्रधानमन्त्री प्रचण्डलाई आग्रह गर्नुभएको थियो ।
