एजेन्सी । विश्व फुटबल च्याम्पियन अर्जेन्टिनाका गोलकिपर एमिलियानो मार्टिनेज भारत आउँदैछन् । उनी एक प्रचार भ्रमणको लागि भारत आउने भएका हुन् ।
३० वर्षीय मार्टिनेज दुई दिनको लागि कोलकातामा हुनेछन् । यद्यपि मिति भने घोषणा गरिएको छैन ।
मार्टिनेज सन् २०२२ को फिफा विश्वकप विजेता अर्जेन्टिनाका गोलकिपर हुन् । फाइनलमा गोलकिपरले दुईवटा बचाउ गरेका थिए । उनलाई गोल्डेन ग्लोभ्स अवार्ड दिइएको थियो । यो अवार्ड प्रतियोगिताको उत्कृष्ट गोलकिपरलाई दिइन्छ ।
खेलकुद प्रवद्र्धक शत्रु दत्तले मार्टिनेजको आगमनको सम्भावित मिति जुन २० देखि २१ वा जुलाई १ देखि ३ सम्म हुन सक्नेछ । दुवै पक्षबीच सहमति भइसकेको छ, कार्यक्रम तय हुन बाँकी छ । ब्राजिलका स्टार फुटबलर पेले र अर्जेन्टिनाका डिएगो म्याराडोनालाई कोलकाता ल्याउनमा दत्तको महत्वपूर्ण भूमिका थियो ।
फिफा विश्वकप २०२२ को फाइनलमा पूर्ण समय र अतिरिक्त समयमा ३–३ गोलको बराबरी भएपछि अर्जेन्टिनाले फ्रान्सलाई पेनाल्टी सुटआउटमा ४–२ ले हराएको थियो । यो खेलमा मार्टिनेजले दुई उत्कृष्ट बचाउ गरे । साथै नेदरल्यान्ड्सविरुद्धको पहिलो क्वाटरफाइनल खेलमा पनि मार्टिनेजले पेनाल्टी सुटआउटमा दुईवटा बचाउ गरेका थिए ।
