एजेन्सी । इंग्लिस प्रिमियर लिग फुटबल अन्तर्गत शीर्षस्थानको म्यान्चेस्टर सिटीले सजह जित निकालेको छ ।
आइतबार राति सम्पन्न खेलमा सिटीले एभर्टनलाई उसकै मैदानमा ३–० गोलले पराजित गरेको हो ।
सिटीलाई जित दिलाउन इल्काए गुन्डोवानले दुई तथा एर्लिङ हालाण्डले एक गोल गरे । खेलको ३७ औं मिनेटमा गुन्डोवानले गोल गर्दै सिटीलाई सुरुवाती अग्रता दिलाएका थिए । यस्तै ३९ औं मिनेटमा हालाण्डले गोल गर्दै सिटीको अग्रता दोब्बर पारे ।
गुन्डोवानले उपलब्ध गराएको पासलाई हालाण्डले हेडरमार्फत गोल गरेका हुन् । ५१ औं मिनेटमा गुन्डोवानले फ्रिकिकमार्फत सुन्दर गोल गर्दै उपाधि होडमा रहेको सिटीलाई महत्वपूर्ण तीन अंक दिलाए ।
शीर्षस्थानको सिटीको ३५ खेलबाट ८५ अंक छ । एभर्टन ३६ खेलबाट ३२ अंकका साथ तालिकाको १७ औं स्थानमा छ ।
