अर्थमन्त्री अनुपस्थित भएपछि स्थगन भएको प्रतिनिधिसभाको बैठक पुन: सुरु

काठमाडौँ। स्थगन गरिएको प्रतिनिधि सभाको बैठक १५ मिनेटपछि पुन: सुरु भएको छ ।

सभामा अर्थमन्त्री डा. प्रकाशशरण महत नभएको भन्दै प्रतिपक्ष दलका सांसदहरुले बिरोध जनाएपछि बैठक १५ मिनेटका लागि स्थगन गरिएको थियो ।

बैठकमा आ.व. २०८०/८१ को लागि विनियोजन विधेयकका सिद्धान्त र प्राथमिकताका सम्बन्धमा छलफल भइरहेको थियो । छलफलकै क्रममा अर्थमन्त्री महत बैठकमा अनुपस्थित भएसँगै बैठक सञ्चालमा प्रतिपक्ष दलका सांसदहरुले अवरोध गरेका हुन् । बैठक स्थगन बारे जानकारी दिँदै सभामुख देवराज घिमिरेले भन्नुभयो – ‘केही प्राविधिक समस्याको कारणले अर्थमन्त्रीज्यूको उपस्थिति केही कारणले ढिला भइरहेको हुँदाखेरी १५ मिनेटको लागि यो बैठक स्थगन हुन्छ । त्यसपछाडी फेरि सुचारु हुनेछ ।’

१५ मिनेट पछि अहिले बैठक पुन सुरु भएको छ ।