काठमाडौँ । नेपाली कांग्रेसकी सांसद कमला पन्तले अर्थमन्त्री डा प्रकाशशरण महतलाई रु ५०० र १००० का नोटमाथि प्रतिबन्ध लगाउन सुझाव दिनुभएको छ ।
राष्ट्रियसभाको आज जारी प्रिबजेट छलफलमा उहाँले पैसा कि कसैको घरमा बाँधिएर बसेको कि सेयरमा रहेको उल्लेख गर्दै बोरामा बाँधेर राखेका पैसालाई प्रतिबन्ध गर्नुपर्ने बताउनुभयो ।
“पैसा एउटाको खल्तीबाट अर्कोको खल्तीमा जान नपाएपछि कसरी अर्थतन्त्र चलायमान हुन्छ ?”, सांसद पन्तले भन्नुभयो, “बोरामा बाँधेका पैसाहरु पाँच सय र हजारका नोटलाई ब्यान्ड गरौँ अर्थमन्त्रीज्यू यदि हामीले समस्या बुझेकाँछौं र हिम्मत छ भने ।” यति गर्न सकियो भने यो पलायन हुँदै गएको अर्थतन्त्रलाई चलायमान बनाउन सकिने उहाँको भनाइ थियो ।
सरकारलाई आगामी आर्थिक वर्षको बजेटमा के गर्ने हो किटान गर्न सुझाव दिँदै उहाँले भन्सारको चुहावट रोक्न के गर्ने हो त्यो स्पष्ट भन्ने, वैदेशिक लगानी बढाउने मात्रै नभनेर लगानीका लागि वातावरण बनाउन ठ्याक्कै के गर्ने हो त्यो भन्नुपर्ने बताउनुभयो ।
