काठमाडौँ । राष्ट्रिय स्वतन्त्र पार्टी (रास्वपा) का उपसभापति डिपी अर्यालले पार्टी सभापति रवि लामिछानेलाई प्रधानमन्त्री बन्ने प्रस्ताव नआएको बताउनुभएको छ ।
सभापति लामिछानेलाई प्रधानमन्त्री बन्नका लागि नेकपा (एमाले) का अध्यक्ष केपी शर्मा ओलीले प्रस्ताव गरेको भन्दै सञ्चार माध्यममा आएका समाचारमा कुनै सत्यता नरहेको उहाँले बताउनुभयो ।
उहाँका अनुसार प्रधानमन्त्री पुष्पकमल दाहाल प्रचण्ड आफूहरुलाई पुराना मन्त्रालयहरु दिन तयार रहनुभएको छ । रास्वपा प्रधानमन्त्री प्रचण्डको सरकारमा गएको बेला उसले गृह, शिक्षा र श्रम तथा रोजगार मन्त्रालय पाएको थियो ।
नागरिकतासम्बन्धी मुद्दामा सर्वोच्च अदालतको आदेशले पार्टी सभापति लामिछानेको सांसद पद गएसँगै उपप्रधानमन्त्री एवं गृहमन्त्रीको पद पनि गुमेको थियो । लगत्तै रास्वपाका अन्य मन्त्री पनि सरकारबाट फिर्ता भएका थिए तर सरकारलाई दिएको समर्थन फिर्ता लिएको थिएन ।
उपसभापति अर्यालका अनुसार प्रतिनिधिसभा सदस्यको उपनिर्वाचन जितेर आएको अवस्थामा रास्वपालाई पुरानो मन्त्रालय दिन र न्यूनतम साझा कार्यक्रम पुनर्लेखन गर्न प्रधानमन्त्री प्रचण्ड तयार हुनुहुन्छ ।
रास्वपाको शुक्रबार केन्द्रीय कमिटी र संसदीय दलको बैठक बस्दैछ । बैठकले रास्वपा सरकारमा जाने वा नजाने भन्ने निर्णय गर्नेछ ।
