काठमाडौँ । काठमाडौँ प्रहरी प्रमुख दानबहादुर कार्कीले नेकपा (एमाले) का सचिव एवं पूर्वऊर्जामन्त्री टोपबहादुर रायमाझीलाई प्रहरीले खोजी गरिरहेको बताउनुभएको छ ।
नेपालीलाई भुटानी शरणार्थीको परिचयपत्र बनाएर अमेरिका पठाउने नाममा लाखौँ असूली गरेको गिरोहलाई सहयोग गरेको आरोपमा पक्राउ पूर्जी जारी भएपछि प्रहरीले उहाँको खोजी थालेको हो ।
काठमाडौँमा बुधबार पक्राउ पूर्जी जारी हुँदा उहाँ अर्घाखाँचीको महेन्द्र विद्योदय माध्यमिक विद्यालयको हिरक महोत्सवमा विशेष अतिथिका रुपमा सहभागी हुनुहुन्थ्यो । उक्त कार्यक्रममा सभामुख देवराज घिमिरे पनि सहभागी हुनुहुन्थ्यो ।
रायमाझी राति ९ बजे घिमिरेसँगै भैरवहा विमानस्थलबाट काठमाडौँ फर्कने तयारीमा हुनुहुन्थ्यो । तर पक्राउ पर्न सक्ने डरले उहाँले स्थलमार्गबाट काठमाडौँ आउने तयारी गर्नुभएको थियो ।
जिल्ला प्रहरी परिसर, काठमाडौँका प्रमुख एसएसपी कार्कीले उहाँको खोजी भइरहेको बताउनुभएको छ । उहाँका अनुसार हालसम्म रायमाझी पक्राउ पर्नुभएको छैन ।
रायमाझीको नक्कली शरणार्थी बनाउने गिरोहका सदस्य केशव दुलाल र सानु भण्डारीसँग निकट सम्बन्ध देखिएको बताइएको छ । दुलाल कांग्रेस नेतृ सुजाता कोइराला परराष्ट्रमन्त्री हुँदा उहाँको निजी सहायक थिए । भण्डारी ललितपुरका व्यवसायी हुन् ।
उनीहरुले रायमाझीलाई विभिन्न स्थानमा घुमाउनेदेखि उहाँका छोरा सन्दीपको नाममा डेढ करोड रुपैयाँको चेकसमेत काटिदिएका थिए । छोरा सन्दीपलाई पनि प्रहरीले गएराति नै बुटवलबाट पक्राउ गरेर अदालतमा उपस्थित गराइसकेको छ ।
