काठमाडौँ । आम निर्वाचन भएको ६ महिना नबित्दै फेरि सरकार फेरबदलको खेल सुरु भएको छ । नेपाल कम्युनिष्ट पार्टी एमालेका अध्यक्ष केपी शर्मा ओलीले राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रधानमन्त्रीको अफर गर्नुभएको आजको राजधानी दैनिकले लेखेको छ ।
एमाले रास्वपा, जसपा, जनमतसहितका दलको समर्थनमा प्रधानमन्त्री नियुक्ति हुनुभएका माओवादी केन्द्रका अध्यक्ष पुष्पकमल दाहाल ‘प्रचण्ड’ले गत ११ पुसमा प्रधानमन्त्रीको शपथ लिनुभएको थियो । तर अहिले एमालेसँग सहकार्य तोडेर प्रचण्ड नेपाली कांंग्रेस, नेकपा (एकीकृत समजवादी)सहितका दलसँग नयाँ गठबन्धन गरेपछि एमाले संघीय र प्रदेश सरकारबाट बाहिरिएको छ । सोही क्रममा एमाले अध्यक्ष ओलीले रास्वपा सभापति लामिछानेलाई प्रधानमन्त्री बन्न प्रस्ताव गर्नुभएको हो ।
एमालेबाट प्रधानमन्त्रीको प्रस्ताव आएपछि रास्वपा अध्यक्ष लामिछाने मगलबार जनमत पार्टीका अध्यक्ष डा सिके राउतसँग छलफल गर्नुभएको छ । प्रधानमन्त्री प्रचण्ड नेतृत्वको सरकारलाई समर्थन गरेको जनमत सरकारसँग असन्तुष्ट छ । एमाले, रास्वपा, जनमत, जसपासहितको दलसँग मिलेर नयाँ गठबन्धन बनाउने र सरकारको नेतृत्व गर्नेबारे लामिछानेले छलफल अगाडि बढाउनुभएको हो ।
रास्वपा उपाध्यक्ष डोलप्रसाद अर्यालले एमालेबाट आएको प्रस्तावअनुसार अन्य दलसँग छलफल भइरहेको बताउनुभयो । अहिले नै अन्तिम निष्कर्षमा पुगिनसकेको बताउँदै उहाँले थप निर्णय पार्टीको बैठकबा हुने बताउनुभयो । ‘राजनीति सम्भावनाको खेल हो, जे पनि हुनसक्छ । तर एमालेले गरेको प्रस्ताव कत्तिको विश्वास गर्न सकिन्छ हेरौँ’, न छलफल भइरहेको छ, ‘अन्तिम निर्णय त पार्टीको केन्द्रीय समितिले गरेअनुसार नै हुने हो’, उहाँले भन्नुभयो ।
सभापति लामिछाने अब जसपा अध्यक्ष उपेन्द्र यादवसँग भेट्न तयारीमा हुनुहुन्छ । तर उहाँहरुबीच भेट्ने समयतालिका भने मिलेको छैन । जनमत पार्टीका नेता विपी साहले दुई नेताबीच पछिल्लो राजनीतिक अवस्था, सरकारलगायतका विषयमा छलफल भएको बताउनुभयो ।
