एजेन्सी । जापानमा महिलाको सुरक्षाका लागि नयाँ विधेयक संसदमा प्रस्तुत गरिएको छ । यदि यो कानून पास भयो भने जापानमा स्कर्ट वा अन्य कपडामा महिलाहरुको आपत्तिजनक तस्बिर खिचेको पाइएमा दोषी ठहरिनेछ ।
साथै उक्त व्यक्तिलाई तीन वर्ष जेल सजाय तथा लाखौँ रकम जरिवाना हुनसक्नेछ । यो कानून सार्वजनिकरुपमा आवाज उठेपछि संसदमा ल्याइएको हो ।
यो कानुन ल्याउनुको उद्देश्य अपस्कर्टिङ जस्ता महिलासँग जोडिएको अपराध रोक्नु हो । बेलायत तथा यूरोपका कैयन देशमा यसप्रकारको गतिविधिलाई बलात्कार अन्तर्गत राखिएको छ । यी देशहरुमा यसप्रकारको अपराधका लागि सजाय पनि तोकिएको छ ।
अपस्कर्टिङ भनेको के हो ?
आपराधिक मानसिकता भएका मानिसहरु छोटो कपडा लगाउने महिलाहरुको तस्बिर लिन्छन् । र, उनीहरुले ती तस्बिरहरु कुनै पोर्न साइटमा बिक्री गर्छन् वा रिभेन्ज पोर्नका रुपमा महिलाको चरित्र हत्या गर्ने प्रयास गर्छन् । यसैलाई अपस्कर्टिङ भनिन्छ ।
जापान टुडे पत्रिकाका अनुसार यसप्रकारको अपराध खासगरी भिड हुने क्षेत्रमा बढी हुने गरेको पाइन्छ । साथै थिएटर, स्टेडियम, सार्वजनिक स्थानमा बढी हुने गरेको पाइन्छ ।
जापानमा सबैभन्दा बढी मेट्रो रेलहरुमा पनि भएको पाइन्छ । यदि उक्त कानून पारित भयो भने अपराधीलाई करिब तीन लाख जापानी येन जरिवाना र तीन वर्षको कैद सजाय हुनसक्छ । उक्त कानून कार्यान्वयनका लागि जापानको मोबाइल निर्माता कम्पनीहरु अडिबल सटर साउण्ड टेक्नोलोजीको प्रयोग सुरु गरिसकेका छन् । जसमा महिलाहरुलाई उनीहरुको आसपासमा कसैले यसप्रकारको गतिविधि गरेको भए सतर्क हुनेछन् । साथै उनीहरुले घटनाबारे प्रहरीलाई रिपोर्ट गर्न सक्नेछन् ।
जापान प्रहरीले सार्वजनिक गरेको तथ्यांक अनुसा सन् २०१० मा यसप्रकारका १ हजार ७४१ वटा उजुरी दर्ता भएका थिए । साथै सन् २०२१ मा यो संख्या ५ हजारभन्दा बढी पुगेको थियो । पछिल्लो समय ८ देखि १० हजारसम्मको संख्यामा यस्ता घटना घट्ने गरेको पाइन्छ ।
