एजेन्सी । इंग्लिस प्रिमियर लिग फुटबल अन्तर्गत आर्सनलले सहज जित निकालेको छ । भर्खरै सम्पन्न खेलमा आर्सनलले लण्डन प्रतिद्वन्द्वी चेल्सीलाई ३–१ गोलले पराजित गरेको हो ।
घरेलु मैदान इमिरेट्समा आर्सनललाई जित दिलाउन मार्टिन ओडेगार्डले दुई तथा गाब्रियल जेसुसले एक गोल गरे । चेल्सीका नोनी माडुएकेले एक गोल फर्काए ।
लण्डन डर्बीको १८ औं मिनेटमा नै ओडेगार्डले गोल गर्दै आर्सनललाई सुरुवाती अग्रता दिलाए । ग्रानिट जाकाले क्रस गरेको बललाई उनले वान टचमा गोल गरे ।
यस्तै, ३१ औं मिनेटमा ओडेगार्डले दोस्रो गोल गर्दै टोलीलाई अग्रता दोब्बर पारे । जाकाले नै उपलब्ध गराएको पासलाई पुनः ओडेगार्डले वान टच मै गोल गरे । ३४ औं मिनेटमा जेसुसले गोल गर्दै आर्सनललाई ३–० गोलले अघि बढाए ।
६५ औं मिनेटमा माडुएकेले गोल गर्दै चेल्सीलाई १–३ को स्थितीमा लगे । त्यसपछि खेलमा थप गोल हुन सकेन र आर्सनल विजयी बन्यो ।
जितसँगै आर्सनल पुनः अंकतालिकाको शीर्षस्थानमा उक्लिएको छ । आर्सनलको ३४ खेलबाट ७८ अंक छ । दोस्रो स्थानमा रहेको म्यान्चेस्टर सिटीको ३२ खेलबाट ७६ अंक छ । यस्तै, चेल्सी ३३ खेलबाट ३९ अंकका साथ १२ औं स्थानमा छ ।
