एजेन्सी । इन्डियन प्रिमियर लिग (आईपीएल) अन्तर्गत ४१ औं खेलमा पञ्जाव किंग्सले रोमाञ्चक जित निकालेको छ ।
भर्खरै सम्पन्न खेलमा पञ्जावले चेन्नई सुपर किंग्सलाई चार विकेटले पराजित गरेको हो । २०१ रनको लक्ष्य पछ्याएको पञ्जावले २० ओभरमा ६ विकेटको क्षतिमा (शून्य बल बाँकी रहँदा) लक्ष्य पूरा गर्यो । पञ्जावलाई अन्तिम एक बलमा तीन रन आवश्यक थियो । शिकन्दर रजा र शाहरुख खान क्रिजमा थिए ।
रजाले अन्तिम बलमा बाउन्ड्रीतर्फ प्रहार गरेका थिए । बल चौका हुन लागिरहेको थियो । चेन्नईका रविन्द्र जडेजाले चौका हुन दिएनन् । तर रजा र शाहरुखले तीन रन लिएर खेल पञ्जावलाई जिताए ।
पञ्जावका लागि प्रभ्सीमरन सिंह (२४ बलमा ४२) लियाम लिभिङ्स्टन (२४ बलमा ४०), साम करण (२० बलमा २९), शिखर धवन (१५ बलमा २८), जितेश शर्माले (१० बलमा २१ रन) जोडे । यस्तै, शिकन्दर रजा ७ बलमा १३ रनमा तथा शाहरुख खान ३ बलमा २ रनमा अविजित रहे ।
पञ्जावका तुषार देशपाण्डेले तीन, रविन्द्र जडेजाले दुई तथा मथिसा पथिरानाले एक विकेट लिए ।
त्यसअघि चेन्नईको एम चिदम्बरम मैदानमा टस जितेर ब्याटिङ थालेको चेन्नईले २० ओभरमा ४ विकेटको क्षतिमा २०० रन जोडेको थियो ।
चेन्नईका लागि डेभोन कोनवे ५२ बलमा ९२ रनसहित अविजित रहे । उनले १६ चौका र १ छक्का प्रहार गरे । यस्तै, ऋतुराज गायकवणले ३१ बलमा ३७, शिवम दुबेले १७ बलमा २८ रन जोड्दा महेन्द्र सिंह धोनीले ४ बलमा १३ रन जोडे । धोनीले अन्तिम ओभरको अन्तिम दुई बलमा लगातार दुई छक्का प्रहार गर्दै चेन्नईको स्कोर २०० पुर्याए ।
बलिङतर्फ पञ्जावका अर्शदीप सिंह, साम करण, सिकन्दर राजा र राहुल चाहरले एक–एक विकेट लिए ।
