एजेन्सी । इन्डियन प्रिमियर लिग (आईपीएल) अन्तर्गत आज पनि दोहोरो हेडर खेल हुँदैछ । आजको दोस्रो खेल मुम्बई इन्डियन्स र राजस्थान रोयल्सबीच मुम्बईको वानखेडे स्टेडियममा हुनेछ । खेल साँझ ७ः४५ बजे सुरु हुनेछ । सिजनमा पहिलो पटक दुवै टोली आमनेसामने हुँदैछन् ।
मुम्बई र राजस्थानबीचको खेल आईपीएलको इतिहासमा १००० औं खेल हुनेछ । मुम्बई आईपीएलको सबैभन्दा सफल टोली हो । यो टोलीले २०१३, २०१५, २०१७, २०१९ र २०२० गरी कुल पाँच पटक आईपीएल ट्रफी जितेको छ । यस्तै, राजस्थान आईपीएलको पहिलो सिजनको च्याम्पियन टोली हो । यस्तो अवस्थामा यी दुई ऐतिहासिक टोलीबीच १००० औं खेल हुन लागेको हो ।
मुम्बई इन्डियन्सले यो सिजन अहिलेसम्म सात खेल खेलेको छ । जसमा उसले तीन जित र चार खेलमा हार बेहोरेको छ । एमआई ६ अंकका साथ तालिकाको नवौं स्थानमा छ । राजस्थान विरुद्धको टोलीका ४ विदेशी खेलाडी क्यामरुन ग्रीन, टिम डेभिड, रिले मेरिडिथ र जेसन बेहरेनडर्फ हुन सक्छन् । यी बाहेक रोहित शर्मा, पियुष चावला र इशान किशन जस्ता खेलाडीले टोलीलाई बलियो बनाइरहेका छन् ।
राजस्थान रोयल्सले यो सिजन अहिलेसम्म आठ खेल खेलेको छ । जसमा उसले पाँच जित र तीन खेलमा हार बेहोरेको छ । पछिल्लो खेलमा राजस्थानले चेन्नईलाई हराएको थियो । आरआर १० अंकका साथ तालिकाको दोस्रो स्थानमा छ ।
मुम्बईविरुद्धको टोलीका ४ विदेशी खेलाडी शिमरोन हेटमायर, जोस बटलर, एडम जाम्पा र जेसन होल्डर हुन सक्छन् । यी बाहेक सञ्जु सामसन, यशस्वी जैसवाल र रविचन्द्रन अश्विन जस्ता खेलाडीले टोलीलाई बलियो बनाएका छन् ।
मुम्बई र राजस्थानबीच अहिलेसम्म कुल २७ खेल खेलिएको छ र यसमा मुम्बईको अग्रता छ । मुम्बईले अहिलेसम्म खेलेका १४ खेलमा जित निकालेको छ । अर्कोतर्फ राजस्थानले १२ खेल जितेको छ । एक खेल भने अनिर्णित रह्यो ।
वानखेडे पिच सधैं ब्याट्सम्यानका लागि सहयोगी रहँदै आएको छ । वानखेडे पिचमा बलरले राम्रो बाउन्स पाउँछन् । यहाँ घरेलु, आईपीएल वा अन्तर्राष्ट्रिय सबै खेलहरूमा रनहरू बन्ने गर्दछन् ।
आइतबार मुम्बईमा मौसम ठीक रहनेछ । बादल लाग्नेछ, पानी पर्ने सम्भावना धेरै छैन । तापक्रम २७ देखि ३३ डिग्री सेल्सियसको बीचमा रहनेछ ।
दुबै टिमका सम्भावित सुरुवाती–११
मुम्बई इन्डियन्सः रोहित शर्मा (कप्तान), इशान किशन (विकेटकिपर), क्यामरन ग्रीन, सूर्यकुमार यादव, टिम डेभिड, नेहल बडेरा, रिले मेरिडिथ, अर्जुन तेन्दुलकर, कुमार कार्तिकेय, पियुष चावला, जेसन बेहरेन्डर्फ ।
राजस्थान रोयल्सः सञ्जु सामसन (कप्तार र विकेटकिपर) जोस बटलर, यशस्वी जैसवाल, देवदत्त पडिक्कल, शिमरोन हेटमायर, रविचन्द्रन अश्विन, ध्रुव जुरेल, एडम जाम्पा, युजवेन्द्र चहल, सन्दीप शर्मा र जेसन होल्डर ।
