काठमाडौँ । आफ्नो जन्मथलो आठराई पुग्नुभएका नेकपा (एमाले) का अध्यक्ष केपी शर्मा ओलीलाई कालो झण्डा देखाएर विरोध प्रदर्शन गरिएको छ ।
सिलाम साक्मा लगाएर सपत्नी जन्मथलो पुग्नुभएका ओलीलाई पहिचानवादीहरुले कालो झण्डा देखाई विरोध प्रदर्शन गरेका हुन् ।
कोशी प्रदेश नामकरणको विरोधमा किरात प्रदेश नाम राख्नुपर्ने भन्दै आन्दोलन गरिरहेका पहिचानवादीहरुले ओलीसामु विरोध प्रदर्शन गरेका हुन् ।
अध्यक्ष ओलीलगायतका नेतालाई पहिचानवादीले मेची राजमार्गमा अवरोध गरेका थिए । उनीहरूले इलाम बजारमा जुलुस तथा कालो झण्डासमेत देखाएका थिए ।
इलाममा भएको कार्यक्रममा अध्यक्ष ओलीले आफूहरूले गरिरहेको संस्कृति र शान्तिपूर्ण व्यवहारका विरुद्ध केही मानिसले हमला गर्ने र ढुङ्गा हान्ने गरेको बताउनुभएको थियो ।
उहाँले पहिचानको नाम गरेर हमला गर्ने, ढुङ्गा हान्ने काम राजनीति नभएर भँडुवा नीति भएको बताउनुभएको थियो । उहाँले ढुङ्गा हान्ने राजनीति र भँडुवा राजनीति छाडेर शान्तिपूर्ण रूपमा लाग्न पहिचानवादीलाई आग्रह गर्नुभएको थियो ।
