काठमाडौं । एसिसी प्रिमियर कपमा साउदी अरेवियालाई ७२ रनले हराउँदै ओमानले सेमिफाइनलमा स्थान पक्का गरेको छ । समूह ए मा रहेको ओमान तीन जितका साथ ६ अंक जोड्दै शीर्ष स्थानमा रहदै सेमिफाइनलमा स्थान पक्का गरेको हो ।
जितको लागि ओमानले दिएको ३ सय ६७ रनको विशाल लक्ष्य पछ्याएको साउदी ४६.५ ओभरमा २ सय ९४ रन बनाएर अल आउट भयो । साउदीका ओपनर अब्दुल वहिदले ८६ बलमा १४ चौका र १ छक्कासहित सर्वाधिक ९५ बनाए । यस्तै, साद खान ८० बलमा १० चौका र १ छक्कासहित ७८ रनमा आउट भए । अब्दुल र साद खानले १ सय ७७ रनको सानदार शतकीय साझेदारी गरे ।
यस्तै, हिशम शेखले ३६ रन बनाउदा अब्दुल वाहिद २५ रनमा आउट भए । साउदीका इमरन आरीफले १० रन जोड्दा अन्य कुनै ब्याटरले दोहोरो अंकमा रन बनाउन सकेनन् ।
बलिङतर्फ ओमानका बिलाल खानले ८.५ ओभरमा ७५ रन खर्चेर सर्वाधिक ४ विकेट लिए । जय ओडेराले ९ ओभरमा ६१ रन खर्चेर ३ विकेट लिए भने जिशान मकसुदले १० ओभरमा ४१ रन खर्चेर २ विकेट लिए । यस्तै,आयन खानले एक विकेट लिए ।
कीर्तिपुरस्थित त्रिभुवन विश्वविद्यालयको क्रिकेट मैदानमा टस हारेर पहिले ब्याटिङको निम्तो पाएको ओमनलले निर्धारित ५० ओभरमा ६ विकेट गुमाउँर्दै ३६६ रनको योगफल बनाएको थियो । ओमनका पाँच ब्याटरले अर्धसतक प्रहार गरेका थिए ।
ओमनका जितेन्द्र सिहले सर्वाधिक ८८ रनको योगदान दिए । उनले ७९ बल खेल्दै ११ चौका र दुई छक्काको मद्दतमा ८८ रनको योगदान गरेका थिए । त्यसैगरी ओमनका अर्का खेलाडी मोहमद नादिमले अविजित ७१ रन बनाउँदा स्वेब खानले ६८ तथा कप्तान जिसन मोक्सुदले ५४ रन जोडेका थिए । त्यस्तै कस्यप प्रजापतिले ५१ रनको योगदान दिए ।
बलिङतर्फ साउदी अरेबियाका अतिफ उर रेहमानले तीन विकेट लिएका थिए भने अबदुल वाइदले दुई विकेट झारे ।
बिहीबार नेपालले समूह ए को अन्तिम खेलमा कतारसँग खेल्नेछ । उक्त खेलमा नेपाल विजयी भएमा समूह विजेता र पराजित भएमा उपविजेता बन्नेछ । समूह बी को कुवेत र हङकङबीचको विजेता टोली सेमिफाइनलमा पुग्नेछ । बिहीबारको नतिजाले मात्रै दुबै समूहको समूह विजेता र उपविजेता निर्धारण हुनेछ ।
प्रतियोगिता पहिलो सेमिफाइनल खेलमा समूह ए को विजेताले समूह बी को उपविजेतासँग खेल्नेछ भने दोस्रो सेमिफाइनल खेलमा समूह बी को विजेताले ए को उपविजेतासँग खेल्नेछ ।
शनिबार सेमिफाइनलको खेल हुनेछ भने फाइनल सोमबार हुनेछ । प्रतियोगिता विजेता टोलीले एसिया कपमा भारत र पाकिस्तासँग खेल्न पाउनेछ ।
यस्तै,शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् ।
