काठमाडौं । एसिसी प्रिमियर कपमा बहराइनलाई ८ विकेटले हराउँदै युएईले सेमिफाइनलमा स्थान बनाएको छ । समूह बी मा रहेको युएई ४ खेलमा ३ जित र १ हारसहित ६ अंकका साथ शीर्ष स्थानमा रहँदै सेमिफाइनलमा स्थान पक्का गरेको हो ।
बहराइनले दिएको १ सय १७ रनको विजयी लक्ष्य पछ्याएको युएईले २७.४ ओभरमा २ विकेट गुमाउँदै पूरा गर्यो । युएईको जितमा युवा खेलाडी वृत्य अरविन्द र रोहन मुस्तफाले अर्धशतक प्रहार गरे । मुस्तफा ५० रन र वृत्य ६२ रनमा अविजित रहे ।
मुस्तफा र अरविन्दले ९९ रनको अविजित साझेदारी गर्दै जित पक्का गराए । कप्तान मोहम्मद वासिम १ र आर्यन लाक्रा ५ रनमा आउट भए ।
बहराइनका स्पिनर अब्दुल मजिदले १० ओभरमा २९ रन खर्चेर २ विकेट लिए ।
त्यसअघि मुलपानी क्रिकेट मैदानमा टस जितेर पहिला ब्याटिङ रोजेको बहराइनले ४०.५ ओभरमा १ सय १६ रनमा अल आउट भयो। एक समय ८०–९ को दयनिय अवस्थामा पुगेको बहराइनलाई अली दाउद र वासिक अहमदले ३६ रनको साझेदारी गर्दै एक सय रनको योगफल बनाएको थियो ।
बहराइनका अली दाउद ४७ बलमा १ चौका र १ छक्कासहित २३ रनमा नटआउट रहे । कप्तान हैदर अली बटले ४९ बलमा ४ चौकासहित २३ रन बनाउदा वासिक अहमद १२ रनमा आउट भएका थिए । बहराइनका अन्य खेलाडिका प्रदर्शन भने राम्रो थिएन।
युएईका स्पिनर आयन खानले १० ओभरमा ७ मेडनसहित ६ रन खर्चेर ४ विकेट लिएका थिए । उनले ६० बलमा ५५ डट बल फ्याकेका थिए । रोहन मुस्तफाले १० ओभरमा ४ मेडनसहित १६ रन खर्चेर २ विकेट लिए । यस्तै, कार्तिक मयाप्पनले पनि १० ओभरमा ४८ रन खर्चेर २ विकेट लिए । जहुर खानले एक विकेट लिएका थिए ।
