काठमाडौँ । एसीसी प्रिमियर कप अन्तर्गत आज शुक्रबार नेपालले ओमानविरुद्ध आफ्नो ५० औं एकदिवसीय अन्तराष्ट्रिय(ओडिआई) खेल खेल्दैछ ।
बिहान ९ बजेदेखि कीर्तिपुरस्थित त्रिवि मैदानमा हुने नेपाल र ओमानबीचको खेल नेपालको ५० औं ओडिआई खेल रहेको छ ।
नेपाली टोलीका लेग स्पिनर सन्दीप लामिछानेका लागि आजको खेल विशेष रहेको छ । यदि आज सन्दीप लामिछानेले एक विकेट मात्रै लिए पनि उनी ओडीआई क्रिकेटमा सर्वाधिक छिटो १०० विकेट लिने खेलाडीको कीर्तिमान बनाउनेछन् ।
उनले अफगानिस्तानका बलर रासिद खानको ४४ खेलमा बनाएको सर्वाधिक छिटो विकेटको कीर्तिमान तोड्दै ४२ खेलमा सय विकेट पूरा गर्नेछन् ।
सबैभन्दा छिटो ओडीआईमा सय विकेट पूरा गर्ने खेलाडीको पहिलो नम्बरमा रासिद खान छन् भने, दोस्रोमा अस्ट्रेलियाका मिचेल स्टार्क रहेका छन् । स्टार्कले ५२ खेलमा सय विकेट लिएका थिए । यस्तै, तेस्रो नम्बरमा पाकिस्तानका सक्लिन मस्तक रहेका छन् । उनले ५३ खेलमा सय विकेट पूरा गरेका थिए ।
