काठमाडौं । भोलि शुक्रबार नेपालले ओमानविरुद्ध आफ्नो ५० औं एकदिवसीय अन्तराष्ट्रिय (ओडिआई) खेल खेल्ने भएको छ।
एसीसी प्रिमियर कपअन्तर्गत शुक्रबार किर्तिपुरको टियु मैदानमा हुने ओमानविरुद्धको खेल नेपालको ५० औं ओडिआई खेल हुनेछ ।
घरेलु मैदानमा आयोजना भईरहेको एसीसी प्रिमियर कपमा एकै समूहमा रहेका नेपाल र ओमान ओडिआई मान्यता प्राप्त देश हुन् । त्यसैले यो खेल ओडिआई मान्यताको हुनेछ ।
सन् २०१८ मार्च १५ मा ओडिआई मान्यता प्राप्त गरेको नेपालले हालसम्म ४९ औं ओडिआई खेलेको छ । नेपालले २०१८ अगष्ट १ मा नेदरल्यान्ड्ससँग पहिलो ओडिआई खेलेको थियो । ४९ ओडिआई खेल्दा नेपालले २६ मा जित, २१ मा हार, एक मा टाई र एक खेलमा नतिजा बिहीन छ ।
नेपालले हालसम्म ७ वटा देशसँग ओडिआई खेलेको छ । ४९ मध्ये आइसिसी विश्वकप लिग–२ अन्तर्गत नेपालले ३६ खेल खेलेको थियो । बाँकी १२ खेल सिरिजको रुपमा र एक खेल प्रतियोगितामा खेलेको थियो । नेपालले सबैभन्दा धेरै युएईसँग १३ र सबैभन्दा कम नेदरल्यान्ड्ससँग २ खेल खेलेको छ ।
नेपालले युएईसँग भएको १३ खेलमा ७मा जित र ६मा हार व्यहोरेको छ । यस्तै, नामिबियासँग ६ खेलमा २ जित, ३ हार र एक खेल वर्षाको कारण नतिजा विहीन बनेको थियो । ओमानसँग ६ खेलमा २ जित र ४ हार, पपुवा न्युगिनीसँग १० खेलमा ८ जित र २ हार भएको छ ।
यस्तै, स्कटल्यान्डसँग ६ खेलमा ३ जित र ३ हार भएको छ भने अमेरिकासँग ६ खेलमा ३ जित, २ हार र एक खेल टाई खेलेको छ ।
