काठमाडौँ । च्याम्पियन्स लिग फुटबल अन्तर्गत सेमिफाइनल प्रवेशका लागि आज मध्यरातमा दुई खेलहरु हुँदैछन् । मध्यरातमा एकै समयमा (००ः४५ बजे) इटालीयन क्लब इन्टर मिलान र पोर्चुगीज क्लब बेन्फिाले प्रतिस्पर्धा गर्दैछन् । यसअघि क्वाटरफाइनल अन्तर्गत नै पहिलो लेगमा बेन्फिकालाई उसकै मैदानमा २–० गोलले पराजित गरेको इन्टरलाई आज आफ्नो मैदानमा २–० गोलको एड्भान्टेज छ ।
यस्तै, आज हुने अर्को रोमाञ्चक खेलमा जर्मन क्लब बायर्न म्युनिख र इंग्लिस क्लब म्यान्चेस्टर सिटीबीच प्रतिस्पर्धा हुँदैछ । यी दुई टोलीबीचको खेल बायर्नको घरेलु मैदान एलियान्ज अरिनामा हुनेछ ।
यसअघि क्वाटरफाइनलको पहिलो लेगमा सिटीले बायर्नलाई आफ्नो मैदान इतिहाडमा ३–० गोलले पराजित गरेको थियो । तसर्थ सिटीसँग ३–० गोलको अग्रता छ । ३–० ले पछि परेको बायर्नलाई घरेलु समर्थकको साथ भरपुर रहनेछ । उच्च लयमा रहेको सिटीविरुद्ध ३–० बढीको नतिजा निकालेर सेमिफाइनलमा स्थान बनाउन बायर्नका लागि निकै चुनौति छ ।
सिटीका फरवार्ड एर्लिङ हालाण्डलाई रोक्नु बायर्नका डिफेन्डरको प्रमुख समस्या हुनेछ । जारी च्याम्पियन्स लिगमा हालाण्ड ११ गोल गर्दै सर्वाधिक गोलकर्ताको शीर्ष स्थानमा छन् ।
बायर्न जर्मन लिग बुन्डेसलिगाको शीर्ष स्थानमा रहँदा सिटी इंग्लिस प्रिमियर लिगको दोस्रो स्थानमा रहेको छ ।
गएराति भएको खेलबाट स्पेनिस क्लब रियल मड्रिड र इटालीयन क्लब एसी मिलानले सेमिफाइनलको यात्रा तय गरिसकेका छन् ।
