काठमाडौँ । एसिसी प्रिमियर कपमा युएईका युवा खेलाडी वृत्य अरविन्द र अलराउन्डर रोहन मुस्तफाको सानदार शतकमा कुवेतलाई ३ सय ७२ रनको विशाल लक्ष्य दिएको छ ।
टियु क्रिकेट मैदानमा टस हारेर पहिला ब्याटिङ गरेको युएईले निर्धारित ५० ओभरमा ६ विकेट गुमाउँदै ३ सय ७१ रन बनायो । युएईका वृत्य अरविन्दले १ सय ४७ बलमा १७ चौका र ९ छक्कासहित १ सय ८५ रनको शतकीय इनिङ खेले ।
यस्तै, अनुभवी ब्याटर रोहन मुस्तफाले पनि १ सय २५ बलमा १० चौका र ४ छक्कासहित १ सय १८ रन बनाए । मुस्तफाले १६ बलसम्म रनविहिन थिए । उनले ९५ बलमा अर्धशतक पूरा गरेका थिए । मुस्तफाले अन्तिम ३० बलमा ६८ रन जोडेका थिए ।
२४–३ को दयनीय अवस्थामा पुगेको युएईलाई विशाल योगफलमा पुर्याउन रोहन मुस्तफा र वित्य अरविन्दले २ सय ७५ रनको दोहोरो शतकीय साझेदारी गरे । ४७ औं ओभरको तेस्रो बलमा सैयद मोनिबको बलमा मुस्तफा आउट भएपछि उक्त साझेदारी तोडिएको थियो ।
युएईका आसिफ खानले ९ बलमा २ चौका र ३ छक्कासहित ३० रन बनाउदा अन्य ब्याटरले दोहोरो अंकमा रन बनाउन सकेनन् ।
कुवेतका बलर प्रविन्दर कुमारले ३ ओभरमा ४५ रन खर्चेर २ विकेट लिए । यस्तै, शाहरुखले ८ ओभरमा ६० रन खर्चेर २ विकेट लिँदा यासिन पटेल र सैयद मोनिबले समान एक एक विकेट लिए ।
