काठमाडौँ । प्रतिनिधि सभा सदस्य अनिता देवीले नागरिकता विधेयक छिटोभन्दा छिटो पारित गरेर नागरिकता बिहीन नेपाली बाबुआमाका सन्तानलाई नागरिकता दिनुपर्ने बताउनुभएको छ ।
मंगलवारको प्रतिनिधि सभा बैठकमा विशेष समयमा बोल्दै सांसद देवीले संसदबाट नागरिकता विधेयक पारित हुन नसकेको प्रति असन्तुष्टि व्यक्त गर्नुभयो । उहाँले नेपाली नागरिकका सन्तान नै नागरिकताबिहीन हुनुपर्दा आफूले पाउने अधिकारबाट वञ्चित हुनुपरेको भन्दै संसदबाट नागरिकता विधेयक छिटोभन्दा छिटो पारित गर्नुपर्ने बताउनु भयो ।
त्यस्तै विशेष समयमा बोल्दै प्रतिनिधि सभा सदस्य अरुणकुमार चौधरीले सरकारले कृषिमा दिने अनुदान वास्तविक किसानले पाउन नसकेका बताउनु भयो । उहाँले झोलामा खेती गर्नेहरुले मात्रै अनुदान पाइरहेका बताउनु भयो ।
उहाँले भन्नुभयो – ‘सरकारले कृषिमा लगानी नगरेको होइन । अनुदान पनि नदिएको होइन । तर के देखिएको छ भने झोलामा खेती गर्ने, कागजी प्रक्रिया पुर्याइहाल्ने तर यथार्थ र वास्तविक किसानहरु पाउनुपर्ने अनुदान पाएका छैनन् । सरकारको ध्यानाकर्षण गराउन चाहन्छु, झोलामा खेती गर्ने प्रवृत्ति छ, त्यो रोकियोस् ।’
उहाँले झोलामा खेती गर्ने प्रवृत्तिलाई रोक्न सरकारको ध्यानाकर्षण गराउनु भयो ।
