काठमाडौं । नेपालका स्पिनर सन्दीप लामिछाने ओडिआई क्रिकेटमा सर्वाधिक छिटो एक सय विकेट पूरा गर्ने विश्व कीर्तिमानको नजिक छन् ।
आइसिसी विश्वकप लिग–२ मा गत २९ फाल्गुनमा पपुवा न्युगिनीविरुद्ध पाँच विकेट लिएसँगै सन्दीप कीर्तिमान नजिक पुगेका थिए। उनले सोहि सिरीजको अनितम खेलमा युएईविरुद्ध एक विकेट लिएका थिए । यससँगै सन्दीपलाई ओडिआईमा सय विकेट पूरा गर्न अव एक विकेट बाँकी छ ।
सन्दीपले ४१ खेलमा ९९ विकेट लिएका छन् । जारी एसीसी प्रिमियर कपमा ओमनविरुद्धको खेलमा एक विकेट लिन सके उनको १०० विकेट पूरा हुनेछ । उनले एक विकेट लिए ४२ ओडिआई खेलमा १०० विकेट पूरा गर्नेछन् । ओमन एकदिवसीय मान्यता प्राप्त राष्ट्र भएकोले नेपाल र ओमनको खेल ओडिआई मान्यताको हुनेछ ।
अफगानिस्तानका राशिद खानले नाममा ओडिआईमा सर्वाधिक छिटो एक सय विकेट लिने कीर्तिमानी रहेको छ । उनले २०१८ मा ४४ ओडिआई खेलमा १०० विकेट पूरा गरेका थिए । राशिद खानपछि अष्ट्रेलियाका मिचेल स्टार्कले ५२ ओडिआई खेलमा १०० विकेट पूरा गरेका थिए ।
पाकिस्तानका सक्लेन मुश्ताकले ५३, न्युजिल्यान्डका शेन बोन्डले र मुश्ताफिजुर रहमानले समान ५४ खेलमा,अष्ट्रेलियाका ब्रेट लीले ५५, न्युजिल्यान्डका ट्रेन्ट बोल्ट र भारतका मोहम्मद शामीले ५६–५६ खेलमा १०० विकेट पूरा गरेका थिए ।
सन्दीप ओडआईमा सर्वाधिक छिटो ५० विकेट पूरा गर्ने विश्वकै दोस्रो खेलाडी हुन् । सन्दीपले २२ ओडिआई खेलमा ५० विकेट पूरा गरेका थिए । श्रीलंकाका अजन्था मेन्डिसले १९ खेलमा ५० विकेट लिँदै सर्वाधिक छिटोको कीर्तिमान कायम गरेका थिए ।
सन् २०१८ मा पहिलोपटक नेदरल्यान्ड्सविरुद्ध ओडिआईमा डेब्यू गरेका सन्दीपले तीन पटक पाँचमाथि विकेट लिईसकेका छन् ।
नोट: यसअघि मलेसियाविरुद्ध एक सय विकेट पूरा हुने भनिएकोमा सच्चाईएको छ
