काठमाडौँ । नेकपा (एमाले) का सांसद रघुजी पन्तले संसद्मा प्रधानमन्त्री हराएको सूचना सुनाउनुभएको छ ।
प्रधानमन्त्री पुष्पकमल दाहाल प्रचण्ड प्रतिनिधिसभाको बैठकमा अनुपस्थित भएपछि सांसद पन्तले व्यङ्ग्य गर्दै प्रधानमन्त्री हराएको सूचना सुनाउनुभएको हो ।
आइतबार प्रतिनिधिसभा बैठकको शून्य समयमा उहाँले प्रहरीले मानिस हराएको सूचना निकाल्ने शैलीमा संसद्मा प्रधानमन्त्री हराएको सूचना पढ्नुभएको थियो ।
सूचना यस्तो छ–
नागरिकताको नाम– श्री पुष्पकमल दाहाल
चलन चल्तीको नाम– प्रचण्ड
स्थायी ठेगाना– फेरिराख्ने
अस्थायी ठेगाना– कहिले खुमलटार, कहिले बालुवाटार ।
हुलिया– पहिले पहिले कोट पाइन्ट लगाउने गरेपनि हाल दौरासुरुवाल र टोपी लगाउने, उमेर ६५ नाघेको ७० नपुगेको जस्तो देखिने । उहाँ केही दिनअघि प्रतिनिधिसभा बैठकमा झुलुक्क देखिएर हाल संसद्मा आउनै छोडेकाले उहाँलाई फेला पार्नुहुने व्यक्तिले संसद् भवन नयाँ बानेश्वरमा बुझाइदिनुहोला । उहाँ अन्तिम पटक देखिएको स्थान बालुवाटारको छेउछाऊ ।
