एजेन्सी । भारतको बिहारको मोतिहारीस्थित तुरकौलिया, हरसिद्धि र पहाडपुर प्रहरी चौकीमा शुक्रबार दुई जनाको मृत्यु भयो । मानिसहरू लेमृत्युको कारण विषाक्त मदिरा रहेको आशंका गरे । पोष्टमार्टम भएन । प्रशासनले झाडापखाला बतायो । त्यसपछि शनिबार दिउँसोसम्म १६ जनाको मृत्यु भइसकेको छ । मृत्यु हुनेको उमेर १९ देखि ४८ वर्षको बीचमा रहेको छ ।
जसमध्ये सबैभन्दा बढी तुरकौलियामा ११, हरसिद्धिमा ३ र पहाडपुरमा २ जनाको मृत्यु भएको छ । बिहीबार साँझ गहुँ बाली काटिसकेपछि खेतमा मदिराको पार्टी आयोजना भएको मृतकका आफन्तले बताएका छन् । उनीहरु राति घर आएर सुते । बिहानै धेरैको स्वास्थ्य बिग्रन थाल्यो । पहिलो पटक बाबु–छोराको अस्पतालमै मृत्यु भएको थियो । यसपछि प्रशासनले गाउँमा मेडिकल टोली पठाएको थियो । विषाक्त मदिराले मृत्यु भएको उनीहरुले अस्वीकार गरे ।
शनिबार बिहानसम्म झाडापखाला र विषाक्त खानाका कारण मृत्यु भएको भन्नेमा प्रशासन अडिग थियो । यहाँ मान्छे मरिरहेका छन्, पोष्टमार्टम नगरी ७ जनाको शव परिवारले जलाएको छ । १२ जना गम्भीर छन्, उनीहरुको बारेमा केही खुल्न सकेको छैन । उनीहरुका आफन्तहरु रोएर दुखी छन् ।
यी मानिसहरूले मदिरा सेवन गरेको कुरा पनि बाहिर आएको छ । यहाँ घटना गम्भीर बन्दै गएपछि प्रहरी प्रधान कार्यालय मोतिहारीका एसपीलाई छानबिन गर्न निर्देशन दिइएको छ । पटनाबाट निषेधाज्ञा विभागको विशेष टोली मोतिहारी जाँदैछ ।
