काठमाडौं । कला, साहित्य, संगित र संस्कृति देशको पहिचान हो । सभ्यता मनमा बोकेर विदेशीएकाहरु पनि आफ्नो संस्कार र संस्कृतिलाई बचाउन कति मेहनत गर्छन् भन्ने उदाहरण बन्दैछ एनआरएनए माल्टा र त्यहाँका नेपालीहरुले स्थापना गरेका विभिन्न सामाजिक संघसंस्थाहरु ।

युरोपेली मुलुक माल्टामा नेपाली नयाँ वर्ष लागिसकेको छ । माल्टामा रहेका गैरआवासीय नेपालीहरु आउँदो २०८० लाई भब्य बनाउनका लागि जुटिसकेका छन् । आगामी बैशाख १ गते अर्थात् अप्रिल १४ तारिखका दिन माल्टामा एनआरएनएको आयोजनामा सांगितिक कार्यक्रमको भब्य तयारी भएको छ ।

गैर आवासीय नेपाली संघ माल्टाका अध्यक्ष भुवन अर्यालका अनुसार एनआरएनए माल्टासहित तीन संस्थाले फरक फरक दिन विविध कार्यक्रम गरि नेपाली नयाँ वर्ष मनाउँदै छन् । अप्रिल १४ मा साँझ ७ बजे The Water Front Hotel Sliema मा भब्य सांगितिक समारोह हुँदै छ । कार्यक्रमको संयोजन संस्थाका सचिव रामप्रसाद भण्डारीले गर्नेछन् ।

चर्चित गायक धिरज राइ र तुल्सी सिवाकोटीसहितको बेजोड प्रस्तुती रहने उक्त कार्यक्रममा नेपालको कला संस्कृति झल्काउनेगरी कर्यक्रम गरिने छ । माल्टामा रहेका नेपाली समुदायबीच आपसी सद्भाव र एकताको उदेश्यसहित कार्यक्रम राखिएको अर्यालले जानकारी दिए । कार्यक्रमको तयारी अन्तिम चरणमा पुगेको आयोजकले जनाएको छ ।

यस्तै अप्रिल १६ मा नेपाल माल्टा च्यारिटी अर्गनाइजेसनले भेलेत्तामा नेपाल डे मनाउँदै छ । कार्यक्रम मार्फत् नेपाली मौलिक कला, साँस्कृतिक रितिरिवाज प्रदर्शन गरिने छ । कार्यक्रमका मार्फत् नेपालको पर्यटन प्रवर्द्वनमा सहयोग पुग्ने एनआरएन अध्यक्ष अर्याल बताउँछन् ।

नेपालको पुरातन संस्कृति र सभ्यतासँग जोडिएका विषय माल्टामा प्रचार हुने भएकाले कार्यक्रमलाई सफल बनाउन एनआरएनए माल्टाले अपिल समेत गरेको अर्यालले जानकारी दिए । कार्यक्रम  Valletta Water Fountain मा साँझ ४ बजे शुरु हुने छ ।

यस्तै अप्रिल २९ मा झापाली समाज माल्टाले पनि चर्चित कलाकार राजेस पायल राई (यो यो) सहितको सहभागितामा सांगितिक कार्यक्रम आयोजना गरेको अध्यक्ष अर्यालले जानकारी दिए । यस अघि विविध सामाजिक काममा सक्रिय झापाली समाजले पहिलो पटक सांगितिक कार्यक्रम आयोजना गरेको हो । कार्यक्रम Orpheum Theatre Gzira Malta मा साँझ ६ बजे शुरु हुने छ ।

पत्रकारलाई संक्षिप्त प्रतिक्रिया दिँदै एनआरएनए माल्टाका अध्यक्ष भुवन अर्यालले सबै कार्यक्रमहरुको आ-आफ्नै उदेश्य रहेको बताउँदै नेपाली समुदायले गरेको कार्यक्रम सबैको साझा भएको बताए । माल्टालाई कर्मथलो बनाएका सबै नेपालीबीच हातेमालोको आवश्यकता रहेको बताउँदै अर्यालले एनआरएनए माल्टाले सबै कार्यक्रम सफल बनाउन साथ दिने बताए ।