सुर्खेत । नेकपा (एमाले) ले कर्णाली प्रदेशमा सरकारलाई दिएको समर्थन फिर्ता लिएको छ । पार्टीको कर्णाली प्रदेशसभा संसदीय दलको बैठकले सरकारबाट बाहिरिएसँगै सोमबारदेखि लागु हुने गरी समर्थनसमेत फिर्ता लिने निर्णय गरेको हो ।
एमालेबाट सरकारमा सहभागी तीन मन्त्रीले आइतबार राजीनामा दिएका थिए । गत पुस १० गतेको समीकरणअनुसार नेकपा (माओवादी केन्द्र) का राजकुमार शर्मालाई मुख्यमन्त्रीमा एमालेले समर्थन गरेको थियो भने माघ ६ गते विश्वासको मत दिएको थियो । त्यसैगरी यही चैन १७ गते पनि दोस्रोपटक मुख्यमन्त्री शर्मालाई एमालेले विश्वासको मत दिएको थियो ।
केन्द्रमा सत्ता समीकरणमा परिवर्तन भएसँगै प्रदेशमा पनि त्यसको असर देखिएको हो । कर्णाली प्रदेशमा एमालेका सभामुखसहित १० प्रदेशसभा सदस्य छन् । अब पुन: मुख्यमन्त्री शर्माले विश्वासको मत लिनुपर्ने भएको छ ।
