काठमाडौं । प्रधानमन्त्री पुष्पकमल दाहाल ‘प्रचण्ड’ र एमालेका केन्द्रीय सचिव लेखराज भट्टबीच भेटवार्ता भएको छ ।
सुदूरपश्चिम विश्वविद्यालयको दीक्षान्त समारोहमा भाग लिन धनगढी जानुभएका प्रधानमन्त्री गोदावारी नगरपालिका–१ अत्तरियास्थित भट्ट निवास पुग्नुभएको हो ।
भट्टको घरबाट बाहिरिने क्रममा सञ्चारकर्मीहरुसँग बोल्दै प्रधानमन्त्री प्रचण्डले भट्ट निवाससँग आफ्नो ४० बर्ष लामो सम्बन्ध रहेको बताउनुभयो । ‘यो घर मेरो पनि हो । यहाँ मेरो एउटा कोठा छ । सधैँ आएर बस्ने खाने, यो घरसँग मेरो ४० वर्षसँगको सम्बन्ध छ । सामान्य विषयमा कुराकानी हुने नै भयो । अरु त्यस्तो कुनै एजेण्डामा कुराकानी भएन।’, प्रधानमन्त्रीले भन्नुभयो ।
पूर्वमाओवादी धारका नेता भट्ट नेकपा विभाजनपछि एमालेमा बस्नुभएको थियो । उहाँले पनि प्रधानमन्त्री प्रचण्डसँग आफ्नो पारिवारिक सम्बन्ध भएको बताउनुभयो ।
