काठमाडौं । न्युजिल्यान्डका कप्तान केन विलियम्सनले आगामी अक्टोवरबाट भारतमा हुने आईसीसी एकदिवसीय विश्वकप गुमाउने भएका छन् ।
गुजरात टाइटन्सबाट आइपिएल खेलेका विलियम्सनले चेन्नई सुपर किंग्सविरुद्धको पहिलो खेलमा फिल्डिङ गर्नेक्रममा घाइते भएका थिए । विलियम्सनको दाहिने घुँडाको एन्टेरियर क्रुसिएट लिगामेन्ट फुटेपछि यसै वर्षको अन्त्यमा भारतमा हुने विश्वकप गुमाउने भएका हुन् ।
नरेन्द्र मोदी स्टेडियम अहमदाबादमा भएको खेलमा फिल्डिङ गर्नेक्रममा टाइटन्सका तीव्र गतिका बलर जोशुवा लिटिलको बलमा सुपर किंग्सका ऋतुराज गायकवाडले हानेको सट छक्का बचाउन खोज्दा विलियम्सन घाइते भएका थिए ।
उत्कृष्ट फिल्डिङ गरेका विलियम्सनले उक्त बलबाट छक्का हुन बचाउँदै टोलीको महत्वपूर्ण दुई रन रोकेका थिए । तर, ल्यान्डिङ गर्नेक्रममा दायाँ खुट्टाको घुँडामा चोट लागेपछि उनले मैदान छाडेका थिए ।
विलियम्सन अहिले न्युजिल्याण्ड फर्किसकेका छन् । परिक्षणमा उनको चोट गम्भीर रहेको पुष्टि भएको थियो । तीन हप्ताभित्र उनको शल्यक्रिया गरिनेछ।
विलियम्सनको अनुपस्थितिमा टम लाथमले न्युजिल्याण्डको कप्तानी गरेका छन् । आगामी पाकिस्तान भ्रमणका लागि एकदिवसीय टोलीको नेतृत्व पनि लाथमले नै गर्नेछन्।
विलियम्सनले १ सय ६१ एकदिवसीय अन्तराष्ट्रियमा ६ हजार ५ सय ५४ रन बनाएका छन् ।
