पोखरा । उच्च अदालत पोखराले पोखरा महानगरपालिका–१८ मा ३० वैशाखमा भएको स्थानीय तहको चुनावको पुनः मतगणना गर्न आदेश दिएको छ ।
निर्वाचनमा ३ मतले पराजित भएपछि एमालेका उम्मेदवार पुष्कल थापाले पुनः मतगणना माग गर्दै जेठ १८ गते अदालतमा निवेदन दिएका थिए ।
उक्त रिट निवेदनमा सुनुवाइ गर्दै अदालतका कायममुकायम मुख्यन्यायाधीश डिल्लीराज आचार्य र न्यायाधीश ऋषिराज भण्डारीको संयुक्त इजलासले मंगलबार उक्त आदेश दिएको हो ।
निर्वाचन आयोगले उक्त वडामा नेपाली कांग्रेसका उम्मेदवार शिवप्रसाद तिमल्सिनाले १६४३ मत पाएर विजयी भएको घोषणा गरेको थियो । उनका प्रतिस्पर्धी एमालेका थापाले १६४० मत पाएका थिए । अदालतले निर्वाचन आयोगको नाममा पुनः मतगणना गर्न आदेश दिएको हो ।
थापाले निवेदनमा निर्वाचन आयोग र वडाध्यक्ष तिमिल्सिनालाई विपक्षी बनाएका थिए ।
