काठमाडौँ । धरानवासीलाई खानेपानी माग्दै धरान उपमहानगरपालिकाका मेयर हर्क साम्पाङ प्रधानमन्त्री निवास बालुवाटार पुग्नुभएको छ ।
धरानमा देखिएको खानेपानी समस्याको दीर्घकालीन समाधानका लागि कोशी नदीबाट धरानमा खानेपानी झार्ने बजेट विनियोजनका लागि उहाँले प्रधानमन्त्री पुष्पकमल दाहाल प्रचण्डसमक्ष ज्ञापनपत्र बुझाउनुभएको छ ।
मेयरसँगै उपमेयर आइन्द्रविक्रम बेघासहितको टोलीले आगामी आर्थिक वर्षको बजेटमा धरानको खानेपानी योजनालाई समेटिनदिन प्रधानमन्त्री प्रचण्डसमक्ष आग्रह गरेको छ ।
प्रधानमन्त्रीलाई बुझाइएको ज्ञापनपत्रमा खानेपानीको अभाव धरानको प्रमुख समस्या भन्दै उक्त समस्याको समाधान गर्न गरिएका यसअघिका प्रयासहरु सहायकसिद्ध मात्र भएकाले समस्याको दीर्घकालीन समाधान कोशी नदीबाट पानी ल्याउनु नै रहेको देखिन्छ भनिएको छ ।
बर्खाको समयमा सर्दु खोलामा भएको पानीलाई जलाशय बनाई सञ्चित गर्न सकेको खण्डमा सुक्खायाममा कम्तीमा पनि चार महिनालाई पुग्ने पर्याप्त खानेपानी रहने हुँदा उक्त आयोजनाको विशेष महत्त्व रहेको ज्ञापनपत्रमा उल्लेख छ । यसका लागि रु एक अर्ब ५० करोड बजेट लाग्ने अनुमान गरिएको छ ।
हाल रहेको खानेपानी संरचना सुधार र पम्प तथा मोटर खरिदका लागि पनि पैसा मागिएको छ । शहरी विकास मन्त्रालयबाट गठित टोलीले पम्प र मोटरहरू खरिद गर्न आवश्यक रहेको सुझाव दिएकाले १० करोड रूपैयाँ बजेट विनियोजनका लागि संघीय सरकारसमक्ष माग गरिएको छ ।
