एजेन्सी । इन्डियन आइडल १३ को उपाधि १९ वर्षीय ऋषि सिंहले जितेका छन् । अयोध्याका ऋषिले कोलकाताकी देबोस्मिता रोय र चिराग कोतवाललाई हराउँदै इन्डियन आइडलको उपाधि जितेका हुन् ।
ट्रफीसँगै ऋषिले २५ लाख रुपैयाँ (भारु) पुरस्कार र फेन्सी कार पनि प्राप्त गरेका छन् । ऋषि कक्षा १२ का विद्यार्थी हुन् ।
इन्डियन आइडलको फाइनल एपिसोडमा विजेता घोषणा गरेपछि सेट इन्डियाले सामाजिक सञ्जालमा विजेताको नाम पनि पोस्ट गरेको छ ।
पोस्ट सेयर गर्दै च्यानलले लेखेको छ – ‘सबैलाई आफ्नो जादू देखाउँदै, रकिङ ऋषिले हाम्रो मन मात्र होइन इन्डियन आइडलको ट्रफी पनि जिते । बधाई छ ऋषि ।’
ट्रफी जितेपछि ऋषिले भने– ‘म विजेता बनेको छु भन्ने विश्वास गर्न सक्दिनँ। यी महान भावनाहरू हुन् । मेरो नाम विजेता घोषणा हुने बित्तिकै मलाई सपना साकार भएको महसुस भयो । मेरो नाम यस्तो मनपर्ने शोको विरासतलाई अगाडि बढाउनु मेरो लागि ठूलो कुरा हो ।’
