काठमाडौँ । पार्टी उपसभापति पूर्णबहादुर खड्काको नेतृत्वमा नेपाली कांग्रेस सरकारमा सहभागी हुने भएको छ ।
कांग्रेस केन्द्रीय कार्यसम्पादन समितिको बिहीबार बिहान बसेको बैठकले सरकारमा पठाउने मन्त्रीहरुको नाम टुंगो लगाउने सम्पूर्ण अधिकार पार्टी सभापति शेरबहादुर देउवालाई दिएको छ ।
कांग्रेसका एक नेताले पार्टी उपसभापति खड्काको नेतृत्वमा कांग्रेस सरकारमा सहभागी हुने न्युजपोलारलाई जानकारी दिनुभयो । उहाँका अनुसार अर्का उपसभापति धनराज गुरुङ, प्रवक्ता डा प्रकाशशरण महत, रमेश रिजाल, एनपी साउद, किशोरसिंह राठोर, सीता गुरुङ र डिगबहादुर लिम्बू मन्त्री बन्दै हुनुहुन्छ ।
पार्टी उपसभापति गुरुङ र लिम्बूबाहेक सबै पार्टी संस्थापन पक्षका हुनुहुन्छ । गुरुङ र लिम्बू भने संस्थापन इतर अर्थात डा शेखर कोइराला समूहका हुनुहुन्छ ।
सरकारमा सहभागी हुने मन्त्रीहरुमा कृष्णप्रसाद सिटौला, प्रकाशमान सिंह, विमलेन्द्र निधि र शशांक कोइराला खेमाका कोही परेका छैनन् ।
प्रधानमन्त्री पुष्पकमल दाहाल प्रचण्डले सम्भवत: बिहीबार बेलुकासम्म मन्त्रिमण्डल विस्तार गर्नु हुनेछ । सत्ता साझेदार दलका शीष नेताहरुको बैठकमा नेपाली कांग्रेसले आठ वटा मन्त्रालय पाउने सहमति भइसकेको छ ।
