काठमाडौँ । प्रधानमन्त्री थ्री नेसन्स कप अन्तर्गत दोस्रो खेलमा घरेलु टोली नेपालले आज मंगलबार भुटानसँग खेल्दैछ । त्रिपुरेश्वरस्थित दशरथ रंगशालामा नेपाल र भुटानबीचको खेल साँझ ६ बजे सुरु हुनेछ ।
भुटानलाई हराउँदै फाइनलमा पुग्ने लक्ष्यका साथ नेपाल मैदानमा उत्रनेछ । यसअघि पहिलो खेलमा नेपालले लाओसलाई २–० ले हराएको थियो । नेपाललाई फाइनल पुग्न बराबरीको नतिजा पनि पर्याप्त छ ।
अर्कोतर्फ पहिलो खेलमा लाओससँग २–१ गोलले हार ब्यहोरेको भुटान पनि नेपाललाई हराउँदै फाइनल पुग्न चाहन्छ । भुटानलाई फाइनल पुग्न जित्नैपर्ने दबाब रहेको छ ।
प्रतियोगितामा आयोजक नेपालसहित भूटान र लाओस गरी तीन राष्ट्र सहभागी छन् । प्रतियोगिताको विजेता टोलीले पाँच हजार अमेरिकी डलर प्राप्त गर्नेछ भने उपविजेता हुने टोलीले तीन हजार अमेरिकी डलर पाउनेछ ।
प्रतियोगिताको उत्कृष्ट खेलाडीले पाँच सय अमेरिकी डलर र खेलको म्यान अफ दि म्याच घोषित हुने खेलाडीले २५० डलर पाउने छन् । फाइनल खेल १७ गते हुनेछ ।
