एजेन्सी । सलमान खानलाई धम्कीपूर्ण इमेल पठाउने व्यक्ति पक्राउ परेका छन् । राजस्थान र मुम्बई प्रहरीको संयुक्त अभियानमा धाकड राम बिश्नोई नामका एक व्यक्तिलाई पक्राउ गरिएको छ ।
उनी २१ वर्षको मात्र छन् । प्रहरीले अनुसन्धानमा इमेल जोधपुरबाट पठाएको पत्ता लागेको थियो । गत हप्ता सलमान खानका म्यानेजर जोर्डी पटेललाई धम्कीको इमेल आएको थियो । उक्त इमेलमा सलमान खानलाई मार्ने भनिएको थियो । त्यसयता इमेल पठाउने व्यक्तिको खोजी भइरहेको थियो ।
बान्द्रा प्रहरीले यस विषयमा एफआईआर दर्ता गरेर अनुसन्धान गरिरहेको थियो । मुम्बई पुलिसले यस मुद्दासँग सम्बन्धित सबै जानकारी जोधपुर पुलिसलाई दिए ।
जोधपुरको ‘सियागो की ढाणी’ निवासी २१ वर्षीय धाडक राम बिश्नोईले इमेल पठाएको प्रहरी अनुसन्धानमा खुलेको छ । धाकड राम बिश्नोईको ठेगाना थाहा पाउने बित्तिकै बान्द्रा प्रहरीका एक उपनिरीक्षक र जोधपुर पुलिसले संयुक्त अभियानमा आरोपीलाई पक्राउ गरे । अहिले उनलाई जोधपुरबाट मुम्बई ल्याउने तयारी भइरहेको छ ।
आरोपी राम बिश्नोईविरुद्ध हतियार ऐन मुद्दा पनि दर्ता भएको छ । उनलाई अवैध हातहतियारसहित सरदारपुरा प्रहरीले १२ सेप्टेम्बर २०२२ मा पक्राउ गरेको थियो । रिपोर्टका अनुसार उनले सिद्धु मुसेवालाका बुवालाई पनि इमेल पठाएका थिए । उक्त इमेलमा उनले मुसेवालाका बुवालाई मार्ने धम्की समेत दिएका थिए ।
