काठमाडौँ । एसीसी मेन्स प्रिमियर कपको बिहीबार सार्वजनिक गरिएको ‘ड्र’ मा आयोजक नेपाल समूह ‘ए’ मा परेको छ ।
एसियाली क्रिकेट काउन्सिलद्वारा सार्वजनिक खेलतालिका अनुसार नेपालले लिग चरणमा मलेसिया, साउदी अरेबिया, कतार र ओमानको सामना गर्नेछ ।
वैशाख ५ देखि १८ सम्म हुने प्रतियोगिताका खेल टीयू र मूलपानी मैदानमा हुनेछन् । नेपालले उद्घाटन खेलमा मलेसियाको सामना गर्नेछ । कुल १० टिमको सहभागिता रहेको प्रतियोगिताको समूह ‘बी’मा बहराइन, कुवेत, सिंगापुर, हङकङ र यूएई छन् ।
लिग चरणको समाप्तिमा प्रत्येक समूहको शीर्ष दुई स्थानमा रहने टिमले सेमिफाइलनको यात्रा तय गर्नेछ । प्रतियोगिताका विजेता टिम एसियाकपका लागि छनोट हुनेछ । यस्तै शीर्ष तीन स्थानमा रहने टिमले एसिया इमर्जिङ कपका लागि स्थान बनाउनेछ ।
एसिया कपको १६औँ संस्करण यसै वर्ष पाकिस्तानमा जनाइएपनि निश्चित भइसकेको छैन । भारतले पाकिस्तानमा सुरक्षा कारण देखाउँदै सहभागिता जनाउन चासो नदेखाएको हो ।
एसिया कपमा आईसीसीका पूर्ण सदस्य रहेका एसियाका पाँच राष्ट्र र नेपालमा हुने एसिया प्रिमियर कपबाट एक टोलीसहित ६ टिमले प्रतिस्पर्धा गर्नेछन् । जसमध्ये आईसीसीका पूर्ण सदस्य रहेका पाकिस्तान, बंगलादेश, भारत, अफगानिस्तान र श्रीलंकाको सहभागिता निश्चित रहँदा नेपालमा हुने छनोटबाट एक टिमको टुंगो लाग्नेछ ।
नेपालमा हुने एसिया कप छनोटको रूपमा रहेको प्रिमियर कपमा एसोसियट राष्ट्रमध्ये वरियताका शीर्ष आठ टिम र थाइल्यान्डमा हुने एसीसी पुरुष च्यालेन्जर कपको फाइनलमा पुग्ने दुई टिम गरी १० टिमले प्रतिस्पर्धा गर्नेछन् ।
यस्तै, प्रिमियर कपको विजेता, उपविजेता र तेस्रो हुने टिम ‘इमर्जिङ टिम्स एसिया कप’मा छनोट हुनेछ । इमर्जिङ टिम्स एसिया कपमा आईसीसीका पूर्ण सदस्य भारत, पाकिस्तान, श्रीलंका, अफगानिस्तान र बंगलादेशका ‘ए’ टिम सहभागी हुनेछन् ।
यस प्रतियोगितामा पनि सहभागी आठ टिमलाई दुई समूहमा बाँडिनेछ । जसको समूह ‘ए’ मा भारत, पाकिस्तान, श्रीलंका र नेपालमा हुने छनोटको विजेता टिम रहनेछ ।
यस्तै, समूह ‘बी’ मा अफगानिस्तान, बंगलादेशसँगै प्रिमियर कपका उपविजेता र तेस्रो हुने टिम हुनेछन् । इमर्जिङ टिम्स एसिया कप जुलाईमा हुने आईसीसीले जनाएको छ ।
