काठमाडौँ । निर्वाचन आयोगले स्थानीय तहको निर्वाचनका लागि आगामी वैशाख ११ र १२ गते उम्मेदवारी दर्ता हुने कार्यक्रम तय गरेको छ । आयोगले शुक्रबार पास गरेको निर्वाचन कार्यक्रमअनुसार उम्मेदवारी दर्ताका लागि वैशाख ११ र १२ गते दुई दिन छुट्याइएको छ ।
निर्वाचन कार्यक्रमअनुसार उजुरी दर्ता, त्यसमाथि जाँचबुझसहितका प्रक्रिया पूरा गरी वैशाख १५ गते उम्मेदवारको नाम सार्वजनिक गरिनेछ ।
उम्मेदवारलाई नाम फिर्ता लिन चाहे वैशाख १६ गतेको समय दिइनेछ । वैशाख १६ गते साँझ ५ देखि ६ बजेसम्ममा उम्मेदवारहरुको अन्तिम नामावली प्रकाशित गरिनेछ । वैशाख १७ गते उम्मेदवारहरुलाई चुनाव चिह्न प्रदान गरिनेछ ।
आयोगका अनुसार वैशाख ३० गते बिहान ७ बजेदेखि साँझ ५ बजेसम्म मतदान हुनेछ । मतदान हुने समयभन्दा ४८ घण्टाअघि अर्थात वैशाख २७ गते मध्यरातदेखि मौन अवधि लागु हुने आयोगले जनाएको छ ।
