काठमाडौँ । फ्रान्सेली क्लब पेरिस सेन्ट जर्मेन (पिएसजी) का फरवार्ड केलियन एमबाप्पे फ्रान्सको राष्ट्रिय टोलीको कप्तानमा नियुक्त भएका छन् ।
राष्ट्रिय टोलीको कप्तानी गरिरहेका गोलरक्षक ह्युगो लोरिसले गत जनवरीमा अन्तर्राष्ट्रिय फुटबलबाट सन्यासको घोषणा गरेपछि एमबाप्पेलाई कप्तानको जिम्मेवारी दिएको हो ।
मंगलबार फ्रान्सेली फुटबल महासंघ (एफएफएफ)ले सामाजिक सञ्जालमा एम्बाप्पेलाई कप्तान र एथ्लेटिको मड्रिडका फरवार्ड एन्टोइन ग्रिजम्यानलाई उपकप्तानमा नियुक्त गरेको बताएको छ ।
२४ वर्षीय एमबाप्पेले सन् २०१७ मा सिनियर डेब्यु गरेका थिए । उनले फ्रान्सका लागि ३६ अन्तर्राष्ट्रिय गोल गरेका छन् । गत वर्षको विश्वकपमा एम्बाप्पे सर्वाधिक गोलकर्ता बनेका थिए । उनले कतारमा भएको विश्वकपमा कुल ८ गोल गरेका थिए ।
