काठमाडौं । नयाँ बानेश्वरस्थित संघीय संसद भवनमा नेकपा (एमाले) को संसदीय दलको बैठक बस्दैछ ।
दिउँसो १ बजे प्रतिनिधिसभाको बैठकमा प्रधानमन्त्री पुष्पकमल दाहाल प्रचण्डले विश्वासको मत लिनुभन्दा ठिकअघि संसद् भवनको ल्होत्से हलमा एमालेको संसदीय दलको बैठक बस्न लागेको हो ।
प्रधानमन्त्री प्रचण्डले यसअघि गत पुस २६ गते विश्वासको मत लिँदा संसद् बैठकमा उपस्थित २७० मध्ये २६८ सांसदले उहाँको पक्षमा विश्वासको मत दिएका थिए ।
सो बेला तत्कालीन सत्ता गठबन्धनमा एमाले, नेकपा (माओवादी केन्द्र), राष्ट्रिय प्रजातन्त्र पार्टी (राप्रपा), राष्ट्रिय स्वतन्त्र पार्टी (रास्वपा), जनमत पार्टी रहे पनि प्रमुख प्रतिपक्षी नेपाली कांग्रेसलेसमेत प्रधानमन्त्री प्रचण्डलाई विश्वासको मत दिएको थियो ।
तर सत्ता समीकरण फेरिएसँगै एमाले र राप्रपाले सरकारबाट आफ्ना मन्त्रीलाई फिर्ता बोलाउँदै सरकारलाई दिएको समर्थन फिर्ता लिएका थिए । त्यसपछि आज प्रधानमन्त्री प्रचण्डले पुन: विश्वासको मत लिन लाग्नुभएको हो ।
