काठमाडौंः प्रधानमन्त्री केपी शर्मा ओलीले नेपाली काँग्रेसजस्तो आफूलाई प्रजातन्त्रवादी भन्ने दलले पनि प्रचण्डपथको बाटोमा हिँडेको हो भन्दै प्रश्न गर्नु भएको छ ।
बालुवाटारमा आयोजित एक कार्यक्रममा प्रधानमन्त्री ओलीले भन्नुभयो, नाथुराम गोड्सेको खोजी भएको छ, नभए बन्न तयार हुने पनि देखियो, यो प्रचण्ड पथ त होइन । उहाँले सर्वोच्च अदालतको संवैधानिक इजलासमा राष्ट्रपति र प्रधानमन्त्री पनि काटिन सक्छन् भन्दा पनि नरोक्ने इजलास प्रति पनि असन्तुष्टि जनाउनु भयो ।
प्रधानमन्त्री ओलीले न्यायमूर्तिहरुले हिंसालाई दुरुत्साहन गर्नु पर्नेमा त्यस्तो नभएको भन्दै न्यायपालिकाले हिंसालाई प्रश्रय दिएको हो भन्दै प्रश्न गर्नुभयो । काँग्रेसजस्तो लोकतन्त्रवादी पार्टीले माओवादी समेतका अवसरवादीको पछि लागेर सरकारको विरोधमा आन्दोलन गर्न खोज्नु ठीक नभएको पनि उहाँले बताउनुभयो ।
प्रधानमन्त्री ओलीले सरकारले देशका विभिन्न भागमा सडक, विद्युत समेतका राम्रा कामहरु गरिरहेको बताउँदै चाँडै कोरोनाभाइरस विरुद्धको खोपको व्यवस्था पनि सरकारले गर्ने बताउनुभयो ।
