एजेन्सी । एक समय थियो जब सलमान खान जुही चावलासँग बिहे गर्न चाहन्थे । यसका लागि सलमानले जुहीका पितासँग उनको हात पनि मागेका थिए । तर, जुहीका पिताले सलमानको प्रस्तावलाई स्वीकार गरेनन् ।
सलमान खानको एउटा पुरानो अन्तर्वार्ता भाइरल भइरहेको छ, जसमा उनले जुहीसँग विवाह गर्ने इच्छा व्यक्त गरेका छन् । तर, सन् १९९५ मा जुहीले व्यापारी जय मेहतासँग विवाह गरिन् । सलमान र जुहीले सन् १९९७ मा फिल्म ‘दिवाना मस्ताना’मा सँगै काम गरेका थिए ।
एक सामाजिक सञ्जाल प्रयोगकर्ताले सलमानको पुरानो अन्तर्वार्ताको छोटो क्लिप क्याप्सनका साथ सेयर गरेका छन् । सलमानले उक्त भिडियोमा भनेका छन्, ‘जुही धेरै प्यारी छिन्, मैले उनको बुबासँग विवाहको लागि हात मागेको थिएँ ।’
सलमान खानसँग सम्बन्धित यो भिडियो सन् १९९० को समयको हो । यो अन्तर्वार्ता भएको वर्षौं बितिसक्यो तर सलमान अझै पनि जीवनसाथीको खोजीमा छन् । जुहीले सन् १९९५ मा नै विवाह गरिन् । उनको प्रेमकथा पनि निकै रोचक छ । उनका पति जय मेहता पहिले नै विवाहित थिए । जब जुहीले जयलाई पहिलो पटक भेटेकी थिइन्, उनकी पहिलो पत्नी सुजाता बिर्लाको विमान दुर्घटनामा मृत्यु भएको थियो ।
