काठमाडौँ । नेपाली कांग्रेस र नेकपा (माओवादी केन्द्र) नेतृत्वको १० दलीय गठबन्धन कार्यदलको बैठक बस्ने भएको छ । बैठकमा उपराष्ट्रपति निर्वाचनबारे छलफल हुने बताइएको छ ।
कार्यदलको संयोजकमा कांग्रेसका उपसभापति पूर्णबहादुर खड्का र सदस्यहरुमा गठबन्धनका सबै दलका दोस्रो तहका नेताहरु हुनुहुन्छ । संयोजक खड्काले शुक्रबार दिउँसो २ बजे सिंहदरबारस्थित कांग्रेस संसदीय दलको कार्यालयमा कार्यदलको बैठक बोलाउनुभएको छ ।
सत्ता गठबन्धनबाट कसलाई उपराष्ट्रपतिमा उम्मेदवार बनाउने भन्नेबार कुनै निर्णय भइसकेको छैन । कार्यदलको बैठकमा उपराष्ट्रपतिको उम्मेदवार चयन, मनोनयन दर्ता र निर्वाचनको तयारीका विविध विषयमा छलफल हुने बताइएको छ ।
उपराष्ट्रपतिको निर्वाचन चैत ३ गते हुँदैछ । सत्ता गठबन्धनको एउटा घटक जनता समाजवादी पार्टी (जसपा) ले आफ्ना नेता रामसहाय यादवलाई उपराष्ट्रपतिमा उम्मेदवार बनाउने निर्णय गरिसकेको छ ।
