काठमाडौँ । नेपालको आइसिसी विश्वकप छनोट खेल्ने सम्भावना अझै कायमै रहेको छ । आइसिसी विश्वकप लिग–२ त्रिकोणात्मक ओडिआई सिरिजमा शीर्ष तीनमा स्थान बनायो भने नेपालले सिधै छनोट खेल्न पाउछ । त्यसको लागि नेपालले बाँकी सबै खेल जित्नुपर्ने हुन्छ । नेपालले अब युएईसँग तीन र पपुवा न्युगिनीसँग दुई खेल खेल्न बाँकी छ ।
आइसिसी विश्वकप लिग–२ का शीर्ष तीन टोलीले आगमी जिम्बावेमा हुने विश्वकप छनोट खेल्न पाउनेछन् । यसअघि नै स्कटल्यान्ड ३६ खेलमा २४ जित र १० हारसहित ५० अंकका साथ च्याम्पियन बन्दै विश्वकप छनोटमा पुगिसकेको छ । यस्तै, ओमान पनि ३६ खेलमा २१ मा जित र १३ हारसहित ४४ अंकका साथ दोस्रो स्थानमा रहँदै छनोटमा पुगिसकेको छ ।
अव नेपाल, नामिबिया र युएई मध्येका एक टोलीले शीर्ष तीनमा रहँदै विश्वकप छनोट खेल्न पाउनेछन् । नामिबियाले ३६ खेलमा १९ जित र १६ हारसहित ३९ अंक पाएको छ । नेपालले नामिबियालाई पछि पार्न बाँकी सबै खेल जित्नुपर्ने हुन्छ । बाँकी खेल जितेमा नेपाल ४० अंकका साथ सोझै विश्वकप छनोटमा पुग्छ । नेपालले एक खेल हार्दा र बाँकी सबै खेल जित्दा ३८ अंक हुनेछ ।
यता, युएईलाई शीर्ष तीनमा पर्न ६ मध्य ५ खेल जित्नुपर्ने हुन्छ । युएई नेपालसँग तीनै खेल हार्दा पनि शीर्ष पाँचको सम्भावना रहन्छ । युएईले नेपाल र पपुवा न्युगिनीसँग समान तीन तीन खेल खेल्न बाँकी छ ।
नेपालले आइसिसी विश्वकप लिग–२ मा ओडिआई मान्यता सोझै जोगाउन बाँकी पाँच खेलमा तीन खेल जित्नैपर्ने हुन्छ । नेपाल ३१ खेलमा १४जित र १५ हारसहित ३० अंकका छैटौं स्थानमा छ । अमेरिका ३६ खेलमा १६ जित र १७ हारसहित ३५ अंकका साथ चौथो स्थानमा छ । नेपालले अमेरिकालाई पछि पार्दै शीर्ष पाँचमा पर्न तीन खेल जित्नुपर्ने हुन्छ ।
ओडिआई मान्यता सोझै जोगाउन नेपालले युएईलाई तीन मध्य एक खेल जिते पुग्छ । युएईलाई एक र पपुवा न्युगिनीलाई दुवै खेलमा हराउँदा नेपालको ३६ अंक हुनेछ । लिग २ मा शीर्ष पाँच र क्वालिफायर प्लेअफमा शीर्ष चारमा पर्न नसके चार वर्षको लागि ओडिआई मान्यता गुम्नेछ ।
नेपालले भोलि सोमबार युएईसँग खेल्दैछ । त्यसपछि, बाकि रहेको चार त्रिकोणात्मक ओडिआई सिरिज भने टियु मैदानमा खेल्नेछ ।
