काठमाडौँ । राष्ट्रपतिमा नेकपा (एमाले) का उम्मेदवार सुवास नेम्वाङलाई मत माग्न नेकपा (एकीकृत समाजवादी) को कार्यालयमा पुगेका एमाले नेताहरूलाई एकीकृत समाजवादीले राष्ट्रपतिमा सघाउन नसक्ने स्पष्ट जवाफ दिएको छ ।
एकीकृत समाजवादीले राष्ट्रपति निर्वाचनमा रामचन्द्र पौडेलको प्रस्ताव रहेको पार्टी भएकाले सहयोग गर्ने परिस्थिति नरहेको जवाफ दिएको पार्टी प्रवक्ता जगन्नाथ खतिवडाले बताउनुभयो ।
पार्टी अध्यक्ष माधव नेपालको भनाइ उद्धृत गर्दै उहाँले भन्नुभयो, “हाम्रो तर्फबाट पार्टीका अध्यक्षले मत माग्न आउनुभयो । सौहार्दपूर्ण वातावरण कुराकानी गर्ने आधार तयार गर्नुभएकोमा धन्यवाद छ । फेरिपनि छलफल हुनसक्छ ।”
पहिलो पटक दुई पार्टीबीच औपचारिक छलफल सुरू भएकाले बैठकमा नकारात्मक कुरा हुनुपर्ने कुनै कारण नहरेको प्रवक्ता खतिवडाको भनाइ थियो ।
एमालेले एकीकृत समाजवादीको अस्तित्वमाथि अनेकौँ कुरा भनेको सबैलाई थाहा छ भन्दै उहाँले त्यही पार्टीले आज पार्टी कार्यालयमा आएर औपचारिक संवाद गर्नु परिवर्तनको संकेत भएको बताउनुभयो ।
