काठमाडौँ । बलात्कार आरोप लागेका अभिनेता पल शाह रिहा भएका छन् । शाहमाथि अभियोग दाबी नपुग्ने ठहरसहित उच्च अदालत पोखराले उनलाई आइतबार सफाइ दिएसँगै उनी सोमबार जेलबाट छुटेका हुन् ।
अदालतले उनलाई जेलमुक्त गर्न आदेश दिएको थियो । बलात्कार आरोपमा अभिनेता शाहले गत वर्षको फागुन १५ गते अर्थात आजैका दिन जिल्ला प्रहरी कार्यालय तनहुँमा पुगेर आत्मसमर्पण गरेका थिए ।
जेलबाट छुट्दा शाहको स्वागतका लागि तनहुँ कारागारबाहिर समर्थकको भिड लागेको थियो । नवलपुर जिल्ला अदालतले यसअघि नै शाहलाई बाल यौन दुर्व्यवहारमा दोषी ठहर गर्दै साढे दुई वर्षको कैद सजाय गरेको थियो ।
शाहमाथि बलात्कार अभियोग दर्ता भएको थियो तर नवलपुर जिल्ला अदालतले बाल यौन दुर्व्यवहारमा दोषी ठहर गरेको थियो । तर तनहुँ जिल्ला अदालतले भने उनलाई निर्दोष ठहर गरेको थियो । पीडित व्यक्तिले शाहविरुद्ध दुईवटा जिल्लामा बलात्कारको उजुरी दिएकी थिइन् ।
तस्बिरः नारायण खड्का
