काठमाडौँ । राष्ट्रिय स्वतन्त्र पार्टी (रास्वपा) ले राष्ट्रपति निर्वाचनबारे छलफल गर्न केन्द्रीय कमिटीको बैठक बोलाएको छ । आसन्न राष्ट्रपति निर्वाचनमा कसलाई मत दिने भन्नेबारेमा छलफल गर्न बैठक बोइलाइएको बताइएको छ ।
रास्वपाले राष्ट्रपतिका उम्मेदवार नेपाली कांग्रेसका रामचन्द्र पौडेल वा नेकपा (एमाले) का उम्मेदवार सुवासचन्द्र नेम्वाङ कसलाई मत दिने भन्नेबारे कुनै निर्णय गरिसकेको छैन । रास्वपाका अनुसार राष्ट्रपति निर्वाचनलाई लिएर दुवैतिर छलफल चलिरहेको छ र सोमबार बस्ने केन्द्रीय कमिटीको बैठकले सोबारे निर्णय लिनेछ ।
कांग्रेस उम्मेदवार पौडेलले शनिबार नै रास्वपाका सभापति रवि लामिछानेलाई भेटेर आफूलाई सहयोग गर्न आग्रह गरिसक्नुभएको छ भने एमालेले पत्रै पठाएर आफ्ना उम्मेदवारलाई मतदान गर्न आग्रह गरेको छ ।
