काठमाडौं । प्रमुख प्रतिपक्ष दल नेकपा (एमालेका नेता भीम रावलले एमसीसी सम्झौता राष्ट्रघाती भएकोले संसदबाट पास गर्न नहुने बताउनु भएको छ ।
बुधबार प्रतिनिधिसभाको बैठकपछि सञ्चारकर्मीहरुसँग बोल्दै सांसद रावलले यस्तो बताउनु भएको हो । उहाँले एमसीसी सम्झौताको धारा ५ का उपधाराहरुमा अमेरिकाको वर्तमान कानून र भविष्यको कानून मान्नुपर्ने लेखेको उल्लेख गरिनुका साथै एमसीसीलाई सन्तुष्ट हुनेगरी भारतको सहमति लिएर योजना छान्नुपर्ने कुरा रहेकोले एमसीसी राष्ट्रघाती हुनुका साथै नेपालको स्वाधिनता र स्वाभिमानबिरोधी भएको बताउनु भयो । सांसद रावलले एमसीए नेपालले विभिन्न मन्त्रालयहरुसँग सम्झौता गर्न उचित नहुने पनि बताउनु भयो ।
सांसद रावलले भन्नुभयो, ‘म स्पष्ट शब्दमा भनिरहेको छु । मिलेनियम च्यालेन्ज कर्पोरेशन एमसीसीसँग भएका मुल सम्झौता, कार्यान्वयन सम्झौता, त्यसपछि गरेका झन्डै एक दर्जन सम्झौतहरुका थुप्रै प्रावधानहरु राष्ट्रघाती छन् । त्यसले हाम्रो देशको स्वाधीनता, स्वतन्त्रता, अखण्डता, स्वाभिमान, आत्मनिर्णयको अधिकारलाई कुण्ठित गर्छ । हाम्रो नेपालको संविधान बमोजिम हामी जो निर्वाचित व्यक्तिहरुले कसैको डर नमानी आफ्नो राष्ट्रको हीतमा उभिनेछौँ भन्ने जुन शपथ खाएका छौँ । कुनै पनि पार्टीको नेता, संसदको सदस्यले शपथको बिरुद्धमा गएर एमसीसीका राष्ट्रघाती सम्झौताका कतिपय प्रावधानहरुलाई मान्न हुँदैन । हामीले कुनै चीनले भारतले अमेरिकाले के गर्छ भनेर यो कुरा भनिरहेका छैनौँ ।
हामी आफ्नो देशको कुरा गरिरहेका छौँ र त्यो सम्झौताका प्रावधानमा के लेखेको छ, त्यसको कुरा गरिरहको छौँ । सम्झौताको धारा ५ मा धेरै उपधाराहरु छन् । अमेरिकाको वर्तमान कानून र भविष्यको कानून मान्नुपर्ने लेखेको छ । त्यसको अनुसूचि ५ मा एमसीसीलाई सन्तुष्ट हुनेगरी भारतको सहमति लिएर योजना छान्नुपर्ने लेखेको छ । अहिले भर्खरै एमसीए नेपालले विभिन्न मन्त्रालयहरुसँग सम्झौता गरेको छ । जबकी एमसीए नेपाल भनेको अर्थ मन्त्रालय अन्तर्गतको विकास समिति अन्तर्गतको सानो कार्यालय भनेको छ । त्यो कार्यालयले मन्त्रालयलाई नियन्त्रण गर्ने सम्झौता गराउने कुन कानून हो रु दफा ५ र ६ मा अमेरिकाको राष्ट्रिय सुरक्षा स्वार्थभन्दा विपरित् कुनै पनि काम गर्न नपाइने कुरा छ भने अर्को कुरा यो कम्प्याक्ट र यस सम्झौतासँग नमिल्ने गरी कसैसँग पनि कुनै काम गर्न नपाइने छ । यो कुरा कुनै देशसँग नभइ हाम्रो देशको परराष्ट्र नीति, स्वाधिनता, स्वाभिमानँग सम्बन्धित छ ।’
