काठमाडौँ । प्रधानमन्त्री पुष्पकमल दाहाल प्रचण्ड र नेकपा (एकीकृत समाजवादी)का अध्यक्ष माधवकुमार नेपालबीचको भेटवार्ता सकिएको छ । सिंहदरबारस्थित माओवादी संसदीय दलको कार्यालयमा उहाँहरुबीच करिब आधा घण्टा कुराकानी भएको थियो ।
भेटपछि पत्रकारहरुको प्रश्नको जवाफ दिँदै माओवादी केन्द्रका अध्यक्षसमेत रहेका प्रचण्डले राष्ट्रपतिको उम्मेदवारको टुंगो लागिनसकेको बताउनुभयो । पुरानो गठबन्धन ब्यूँताउन लाग्नुभएको हो भन्ने पत्रकारको प्रश्नमा उहाँ ले अझै टुंगो नलागेको बताउनुभयो ।
एकीकृत समाजवादीका अध्यक्ष नेपालले विभिन्न विकल्पमा छलफल भइरहेको तर निष्कर्षमा पुगिनसकेको बताउनुभयो । उहाँले भन्नुभयो, “हामीले विभिन्न विकल्पमा छलफल गरिरहेका छौँ । हामीसँग विभिन्न विकल्प छन् । त्यो मध्ये देशलाई हित हुने विकल्प रोज्छौँ ।”
उक्त भेटघाटमा माओवादीबाट प्रचण्ड र नारायणकाजी श्रेष्ठ, एकीकृत समाजवादीबाट माधव नेपाल र घनश्याम भूसाल सहभागी हुनुहुन्थ्यो ।
