काठमाडौं । लोसपा नेताहरूले नेपाली कांग्रेसका सभापति शेरबहादुर देउवालाई भेटेका छन् ।
उनीहरु महन्थ ठाकुरलाई भावी राष्ट्रपति बनाउनुपर्ने मागसहित देउवा निवास धुम्वाराही पुगेका हुन् ।
भेटमा देउवासँगै उपसभापति पूर्णबहादुर खड्का पनि सहभागि थिए । भेटपश्चात् बाहिरिने क्रममा लोसपा नेता शरदसिं भण्डारीले कांग्रेसबाट सकारात्मक प्रतिक्रिया पाएको बताए । भण्डारीले देउवाको भनाई उद्धृत गर्दै भने , ‘ महन्थजी सहमतिका लागि उपयुक्त पात्र हो । हामी पार्टीभित्र पनि छलफल गर्छौं । कांग्रेसले आधिकारिकरूपमा आफ्नो उम्मेदवार अघि सारेको छैन । तपाईँ/हामी एलायन्समा छौं । सहमतिको परस्थिति बन्यो भने उहाँ पनि उपयुक्त हो भन्नुभएको छ।’
प्रधानमन्त्री प्रचण्डबाट राष्ट्रिय सहमतिको कुरा आएकोले भावी राष्ट्रपतिमा ठाकुर नै उपयुक्त रहेको भण्डारीले बताए ।
