काठमाडौँ । जनता समाजवादी पार्टी (जसपा) का सांसद प्रदीप यादवले राष्ट्रपतिको भिटो अधिकारबारे छलफल हुन जरुरी रहेको बताउनुभएको छ । प्रतिनिधिसभाको बुधबारको बैठकमा उहाँले यसअघि संसद्ले नागरिकता ऐन संशोधन विधेयक पारित गर्दा राष्ट्रपति विद्यादेवी भण्डारीले रोकिदिएको बताउनुभयो ।
उहाँले दुई पटकससम्म संघीय संसद्ले पारित गरेर पठाउँदा समेत राष्ट्रपतिले प्रमाणीकरण नगरिदिएकाले राष्ट्रपतिको भिटो अधिकारबारे छलफल हुनुपर्ने बताउनुभयो । संविधान जारी भएको ८ वर्षसम्म संविधानअनुसार नागरिकता ऐन नबन्नु दुःखद हो भन्दै उहाँले नागरिकता ऐन संशोधन नहुँदा ६ लाखभन्दा बढी नागरिक नागरिकताविहीन हुनुपरेको बताउनुभयो ।
बुबा, आमा, काका, काकी नेपाली नागरिक तर बालिग सन्तान अनागरिक कसरी हुन्छन् भन्ने प्रश्न गर्दै उहाँले भन्नुभयो, “कुनै कुनै त दाइ दिदी नागरिक र भाइ बहिनी अनागरिक भएको स्थिति पनि छ ।” अझै पनि नागरिकता विधेयक सदनमा ल्याउन र पारित गर्नमा ढिलाइ भए सदन र सडकमा आन्दोलन चर्काउने चेतावनी सांसद यादवले दिनुभयो ।
